Ka seiñ wa tip kam ka Anti Corruption League kawa na West Garo Hills da phah dorkhat ko cha u Montri Rangbah ka jylla Meghalaya neibynta ki Dkhar namo ki Non-Tribal kiwa man kam kiwa chong chnong ki Plain Belt ka Garo Hills hajrong ka Reservation Policy ka jylla.
Ha ka dorkhat da pynsñiaw ki yei sñiawkhia neibynta ki tre chnong ka Meghalaya kiwa man kam ki ‘Desi Muslim’ wa em ha Garo Hills wa kamjooh leh ya waroh ki Non-Tribal wa em ha Meghalaya heiwa hadien wa pynkha ya ka Meghalaya ha u snem 1972, ki Non-Tribal da em ki kamwa 20% i boon paaid ha waroh kawi ka jylla.
Da ong ki leh wym ye u len yei embynta lang ki Desi Muslim wa kiwi ki Dkhar wow yakhih hapoh ka Hill State Movement hapoh i yahkhmat u Captain Williamson Sangma wei da e ki yei kyrchaan hanla da ki spah snem da man ki kam kiwa bood yei rukom im ki Assamese kamjooh ka dustur riti deiwa yooluti ki wa ha ka jylla wa thymme daw yoh ki yei hok yong ki wei daw yada leh yei khih i khan ki wei yeiwa emkaam yong ki.
Da pynkynmoo ki leh wa ha ka yalang ki le liang wa kynthup ya ka sorkar pyrdi, ki Non-Tribal wa da yahkhmat da u Akramuz Zaman kam u MDC wa u Captain W.A. Sangma uwa da yahkhmat ya ki jaitbru ri-loom, da yoh ki yei kular wow yoh bhah wa salonsar yow ye ki u heh u san, u roi u paar kamwa yohlaad ki jaitbru ri-loom ka Meghalaya.
Tangwa hadien wa da chna ya ka Meghalaya, ki Dkhar da em ki du i naam donhi kam kiwa chong chnong namo ki Second Class Citizen heiwa i yoh myntoi naka Reservation da e du cha ki jaitbru ri-loom wei lada yoh ki leh da man du chi troh na iwa da kular ya ki.
Ym em ki leh i hok wow man kam ki tre thaw lait noh du ha ki kattu katni ki thaw (Mouja) wei ym yohlaad ki leh wow lai puræ cha kiwa heh kyrdan, ym yoh leh ya ki kreh Contract ya ki kaam sorkar wot hadooh wow seiñ khih da kiwa khian wa nai yow ye ki wow im deiwa em burom da man ko kawa eh bha ya ki.
Kamtæ da kyntu ya u Montri Rangbah wow sñiawbha u pait ya ka hukum ka Supreme Court wa da pynmih ha u snem 1992 kawa da ong wa i booh bhah hapoh ka Reservation Policy ym toh u palat 50% heiwa ha Meghalaya ka Reservation da em ko palat 85% iwa man pyrchah ya ka hukum ka Supreme Court.
