Ka All Meghalaya Commercial Vehicles Owners and Drivers Union, deilang wa ki seiñ kiwa yah kari kamai, ynne ka sngi da yachem ki wa ki bor pynlai District ka East Khasi Hills, wow pynbait ya i dor bai kari.
U Egenstar Kurkalang uwa man uwa yalam yaka Union da ong wa kani ka kynhun ka pysñiaw ko wa emkaam wow pynku noh ya ka bai kari neibhah wa da ku dor phniang kari wei kiwa yah kari ym ye de ki wow pynmih ya ka bai kamai, heiwa da ong u wa hadooh katni ym pu yoh ya i rai wa paka neibhah ka bai kari ym toh du neibynta i chi thaw, wei ya ini i dor daw chong yalang biang wa u District Transport Officer.
Kam wow kdaw heini wa ka yakhih yong kiwa yah kari kamai hapoh ka lama yong ka Meghalaya Joint Action Committee of Commercial Vehicles (MJACCV) da pynman ya ka yakhih deiwa sangeh kamai nadooh ka 3 tarik uni u bnai neidaw wym bna ka sorkar hajrong i dawa wow pynhiar ya ka dan yong ka Petrol wa Diesel da 25% wei kamjooh wow pynhiar ya ka dan yong ki kot kari da 50%.
Hawa kylli ya i yapiah wa ka MJACCV, u Kurkalang da kyntait u wa em i yapiah, wei ym kwah u wow ong iyi iyi, tangwa da ong u wa i yachem wa ki bor pynlai District toh neidaw wa kulmar palat hapyrdi kiwa yah kari wa kiwa chong kari wei hadien wa da pynbna ka sorkar wow chim da i jooh i dor ya ki kari kamai.
Da ong ong u wa lada toh iwa ye, toh u pynhaap chooh chooh ya i dor yong i Petrol, deiwa ong wa i ku dor i Petrol toh ha waroh kawi ka ri India wei ym yaphær ko na kiwi ki jylla wei chong hei stad yong ka sorkar wow pynkrehkaam.
U Kurkalang da ong u katni katwa ym pu ye u pynbait ya i dor wa yahaap wa i ku Petrol, neiliang katai ka kynhun ym pu mih kamai.
