Jowai: Ki Home Guard Volunteers hapoh i yahkhmat ka seiñ Khasi Student Union (KSU) ynne ka sngi dei wym yohsa de ki, da mih sarok ki neibynta u lai dawa yaka bai nong sngi yong ki naka yung krehkaam ka Home Guards & Civil Defence Jowai kamjooh leh naka yung krehkaam u Deputy Commissioner West Jaiñtia Hills District.
Ya kini ki Home Guard Volunteers da thung yaki hadien wa wan ka khlam COVID-19 yow yarap ki yaka chnat pulit heiyathoh wa ka khlam COVID-19 wei u su da ka nong sngi.
Hei yaklam wa ki kattu katni ki Home Guards Volunteers khana ki wa nadooh wa sdang kreh ki yei kam da yoh ki yei nong dang du kamwa 40 sngi hei dor T. 550 chi sngi, tangwa sa 171 sngi won ka bai nong wym pu em yoh ki hadooh ynne ka sngi.
Da khana ki wa neidaw wym yoh nong da chem chitom bha ki ha kiwa boon ki liang, katwa yei kaamram won hap ki wow pyndep man-ka-sngi. Khana haroh ki wa heiyatoh wa ki Containment Zone, da boon hi toh da ki Home Guards Volunteers wa yang sonteri, tangwa ha kam kini ki khep leh boonsien hap ki wow chah thngan.
Sa iwi leh ong ki wa napyrdi yong ki boon hi toh kiwa wan na nongkyndong wei sah yungwai ha Jowai, kamtæ neidaw wym yoh nong yow su bai wai, ki tre yung ym chah de ki wow sah.
Ha kani ka sngi kini ki Home Guards Volunteers deilang i synran ki dkhot ka KSU da mih ki na Jowai Police Station wei lai cha ka yung krehkaam Home Guards & Civil Defence Jowai wei hadien i yaklam wa u D.R. Lamare, District Home Guards Commandant, Jowai da hiar won ki cha ka yung krehkaam u Deputy Commissioner, West Jaiñtia Hills District.
Hadien i yachem ki dkhot ka KSU wa u DC u Garod LNS Dykes, wada yahkhmat da u Leningrad Tariang Organising Secretary, WJH District, wa u Education Secretary Jaiñtia Hills u Justice Paul Lyngdoh, khana ki wa neiliang u DC ong u i daw wa slem u su yei nong cha ki Home Guards Volunteers toh wa neidaw wa em i yaphær i dor wa phah na kani ka District wa i dor wada mang ka sorkar.
U DC pyntip haroh u cha ki wa nachwa yaka nong wada su neibynta 40 sngi toh da su da yung krehkaam yong oo hei dor T. 550 chi sngi, kamtæ hadien wa da em won i pynbait wow su ka sorkar, neiliang ka District da phah ko ya i dor bai nong sngi, tangwa neidaw wym em yahap wa i dor wa mang ka sorkar T. 439 chi sngi kamtæ da hap wow pynbait biang yaki kot ki sla tæ chimpor yaki wow yoh yei nong.
Heijooh i por ka seiñ da kyntu joor ko yaka sorkar wow pynsmat ko u su yei nong kini ki Home Guards Volunteers kiwa da chem jynjar katni, nalor wa ki man ki leh kiwa yakhun wa hakhmat yong ka khlam COVID-19.
Ka seiñ pynsñiaw haroh ko wow booddien yeini wei ym chong klikti ko lym yoh ki Home Guards Volunteers yei hok wada dep kreh ki.
