Ka Committee wa da thung da ka sorkar jylla wow yatai hajrong ka Reservation Roster waka Reservation Policy da pynbna ko wow rah bait cha ka sorkar ya waroh i e yumut na ki seiñ saiñpyrthai.
Neiliang yong ka Chairperson yong kani ka Committee, ka Dr. M Ampareen Lyngdoh da pyntip ko wa ka yalang man ko kawa mih soh, heiwa waroh ki seiñ saiñpyrthei wa kynthup ya ka Voice of the People Party (VPP) da e yumut ki wei da paan leh yei pynche. Tangwa neiliang ka Committee da paan ko dei thoh ya waroh iwa da e yumut hapoh 15 sngi.
Ka Dr. Ampareen da khana ko leh wa neiliang ka Committee da paan ko ya ki daw kiwa em yurim lada em iwon iwon wa kwah ki yow pynbait thymme ha ka Reservation Policy.
Ha kani ka yalang kawa da neh palat 3 kynta, ka Chairperson kawa man leh ka Montri wa pait ya ka kam aiñ ka jylla, da khana ko wa em chiboon i e yumut, em kiwa kwah wow em ka Status Quo yow pynneh bait kamwa man, em leh kiwa kwah wow chna ya kawi won ka Committee ka wow em da ki bru chemphang ha ki kaam aiñ, ki kaam i yoh i kot wa kiwi kiwi yow ye u bichaar yei yoh nong wa i dooh nong.
Ka Dr. Ampareen da khana ko wa em ki kattu katni ki seiñ saiñpyrthai kiwa da pynsñiaw wa ki emkaam ki wow yaklam chwa hapoh ka Party hachwa wow phah yei e yumut hajrong i pynkylla ya ka Reservation Policy, wei da pynrap wa hajrong kini ki yurim, ka Committee da rai ko wow e por ya waroh ki seiñ saiñpyrthai 15 sngi yow phah dei thoh wei hadien 3 tayaw daw yachem biang.
