Hadien ka yakhih kawa joor bha ha kiwi ki jylla ka ri India pyrchah ya ka Scheme psiah kreh chipai, ynne ka sngi da ki spah ngut ki khynroo wa thooh kreh da mih paidbah ki ha nongbah Shillong.
Ini i mih paidbah toh iwa khlem da pyntip chwa wei khlem da paan bor na ka DC iwa da pynkhyrngiat ya ki pulit kiwa da lai wow khang noh ya ki wow lai paidbah, wei da phah ya ki wow pynman ya ka yakhih hakhmat u mot yong u Kiang Nangbah uwa em hajan Shillong Civil Hospital.
Kini ki khynroo wa da mih kynthup ya ki Khasi wa na kiwi ki jaitbru kiwa da lai ha ki kattu katni ki bynta ka nongbah Shillong deilang wa i kbai wa kwah ki yei hok.
Kini ki khynroo da dawa ki leh wa toh u pynman ya ka Common Entrance Examination (CEE) wei ya i pynpsiah kaam chipai (Army Recruitment Rally) toh u sdang smat noh.
Heijooh i por kini ki khynroo da kbai pyrchah ki leh ya ka Scheme pynpsiah kaam thymme yong ka sorkar kawa tip kam ka Agnipath Scheme yow psiah kaam chipai. Katkam i ong kini ki khynroo, i pynpsiah lyngba ka Tour of Duty (ToD Recruitment Mode) yow pynpsiah kaam ya ki khynroo neibynta 4 snem kam ki chipai Agniveer daw pynsih ko yei angnood yong kiwi kiwa kwah u yoh yei kreh wa pura ha ki kaam chipai ka ri.
