Mih syndet u Andrew na ka dorbar hadien wym chah u klam ya ka mat wa ktah ya ka JHADC

Uwa yahkhmat ka Liang Pyrchah hapoh ka Jaiñtia Hills Autonomous District Council (JHADC) u Awhai Andrew Shullai ha ka Dorbar La’yur yong ka Council ynne ka sngi da mih syndet u na dorbar nei chrai wym pdiang u Chairman ya ka mat namo ka Motion yong oo wa da wanrah u wow yaklam ha ka dorbar.

Ka mat wa da wanrah u Andrew toh ka “The House do now discuss the lack of E-Governance in the council and digitization of office records for improved and efficient delivery of services provided by the council” namo i duna i krehkaam ka Council katkam i stat ka juk wa katni.

Hawa yaklam wa u Chairman ka JHADC u Dr. Sankey Shangpung hadien wa kut ka dorbar da ong u wa kam u Chairman da pynkupbor ya oo wa ye u wow kyntait ya iwon iwon i bynta wym che deiwa pynemkaam da ka Rule 123 yong ka Council neibhah ka Motion wa wanrah u Andrew Shullai toh ka wym che kamtæ da kyntait u wow yaklam hapoh ka dorbar.

Hawa yaklam won wa u Awhai Andrew Shullai da ong u wa i rukom leh wa kam ini hapoh ka Council wa yahhmat da ka NPP ymtoh de ka sien wa nyngkong tangwa dei langær heiwa ki liang pyrchah hawa wanrah ya kiwon kiwon ki Motion, Resolution wa Question da jooh chah kyntait ki hajrong wym jubab ki deiwa che.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Da ong u leh wa i bor u Chairman em ko ha ka Rule 62 kawa ong wa ye u wow kyntait ya iwon iwon i wym yahaap wa ki kyndon wa kynthup ya kiwa ktah ya ki bru samen, kiwa cha baar ka Council næ ki wym ye u pdiang tangwa ka Motion wa wanrah u ynne won toh kawa biang wa ki kyndon.

Chooh chooh da ong u wa i leh yong ka Liang Synchaar toh i buit wow kiar u yaklam ya kiwon kiwon kiwa ymye ki u kreh namo i wym ye ki wow pynkrehkaam hapoh ka Council.

Heijooh i por ka Rule 62 ong ko, “The Chairman shall decide on the admissibility of a motion and shall disallow any motion if; in his opinion, it does not comply with the provisions of the rules regarding the admissibility of motions” iwa mut da pynkupbor ha u Chairman lada u pdiang næ kyntait ya ka Motion heiwa da ong u wa u Chairman da khana u wa da phah kyntait wow klam ya ka mat toh nei ong ka Liang Synchaar hapoh ka Council wa yahkhmat da ka NPP.