Jowai: U Winning G Sungoh uwa man u MDC naka 14-Mowkaiaw Constituency ha ka 4 tarik da mih noh u na ka party Congress wow psiah noh cha ka party UDP wow yakhun ya ka election MDC.
Ya u Winning G Sungoh da pdiang ya oo ha kani ka sngi ha Jowai da kiwa kitkaam ka UDP West Jaiñtia Hills District wa kynthup ya u President u Moonlight Pariat, u General Secretary u Kitboklang Nongtdu, u Marki Mulieh ryngkat i emlang u Eleazer Dkhar u President UDP 4-Mowkaiaw Circle, uwa da thmu wow yakhun na ka party tangwa da ekti noh u ya ka ticket cha u Winning wei da randien noh u wow yakhun MDC.
“Ini i mih noh u Winning na ka Congress deiwa wan cha ka UDP toh iwa rap phylla wa u Blai da leh u heipor wa tbian neibhah rap tip u kammon wow im ka jaitbru khamtam ka District neibhah ha ki por wa dadep duna i ya kiwa yahkhmat, kamtæ ngait skem i wa lyngba i yahluti yong oo daw ye u yoh yei synchaar yong du kawi ka party kawa skem hapoh ka JHADC wei wow yoh u kreh san snem lynter khlem iwon iwon i thut wei ki paidbah leh u yoh myntoi ki deiwa paka,” da ong u Moonlight Pariat.
Neiliang u Eleazer da ong u wa hadien wa pynchong yurim wei pyrkhat yillu wa kiwa kitkaam ka party nalor wa man u kam u President ka 4-Mowkaiaw Circle sñiaw u wa lada em wa chimkti noh ya ka ticket heithaw yong oo man i iwa miat neibhah wa oo u ye u wow kreh wow pynkhlan chooh chooh ya ka Party.
Katwa neiliang u Winning G Sungoh uwa man kam u MDC ka 14-Mowkaiaw uwa da jop na ka Congress da ong u wa da rai u wow yakhun na ka UDP toh wa thrang u wow wanrah biang yei yatylli ha ka thaaiñ kam ki por nachwa. Da ong u leh wa kani man ko kam ka laad ka kabu wow kmen neibhah u MLA ka thaaiñ leh toh uwa na ka UDP.
Ya ka chithi mih seiñ na ka Congress u Winning da ekti u ha kani ka jooh ka sngi ha u President ka District Congress Committee u A.A.Shullai.
Discussion about this post