Ka Selsella Sports Association da pteiñ ko yei lai luti khlem rem ha ka Meghalaya State League 2023 deiwa jop da 8-3 ya ka Atong Matgrik haka Group D ha Tura ynne ka sngi.
Ha waroh ki le tylli ki Group wa da pynman yalehke ynne da em ki ha ka Final Round, tangwa ym em ktah ko ya kiwa da yoh nyngkong ha ki jar jiar ki Group.
Ka Mulait United da pynkut ko yei lai luti ha kani ka MSL 2023 deiwa jop da 6-1 yaka Rymbai Iawpynsing ha Group B, katwa ha ka Group A, ka Umkseh waka Umrit da kut ka yalehke ki da 2-2.
Ha Jowai, ka Mulait da yoh Hat-Trick u Jas Chyrmang (19′, 49′, 66′) katwa kiwi ki kool da thap da u Romarius Laban (63′, 64′) wa u Lency Swer (31′) iwa mut da knieh ki yei wa ar na ka Ladthadlaboh deiwa yoh 12 Point la 10 Point. Ya ka Rymbai da thap kool da u Rimitre Lyngdoh (55′).
Ki yalehke mynstep:
Group A, Shillong- Mawlai Vs Seng Samla Laitryngew, 3:00 PM
Group B, Jowai – Niaw Wasa United Vs Sein Pynbhalang, 2:30 PM
Group C, Mawkyrwat – Pyndengrei vs Riangdo, 3:00 PM
Group D, Tura – Warima Vs Khliehmawlieh Youth Club, 3:00 PM
