Ka Ladthalaboh ynne da yalehke ko ya ka khaddooh (Group Match) wei da rem ko da 5-0 ha ka Niaw Wasa United hapoh ka Group B ka Meghalaya State League 2023 ha Jowai.
Ha kiwi won ki yalehke, ka Khliehmawlieh Youth Club da pynskem ko yei thaw ha ka Group D deiwa jop ya ka Wasa FC 4-1 ha Tura. Ha Mawkyrwat won ka Riangdo da jop ko ya ka Lumdiengngan da 4-1 ha ka Group C. Khaddooh won, ka Langsning ynne da yoh ko yei naam kam kawa thap boon kool dooh ha kani ka MSL 2023 deiwa jop ya ka Seng Samla Laitryngew da 11-0 ha ka Group A ha Shillong.
Ha Jowai ya ka Niaw Wasa da thap soo kool da u Jeffree Surong (4′, 7′, 45’+3, 70′) katwa u Owanijuh Pajuh (68′) da thap u chi kool. Ka Niaw Wasa kattu da jop ko le sien wei da rem arsien wei dang emlaad ko wow psiah Semfinal.
Ka Ladthadlaboh hadien 6 tylli ki yalehke da yoh ko 10 Point deiwa rem arsien ban ban. Ka Niaw Wasa da em ko hei wa soo deiwa yoh 9 Point wei daw yaleh ko sa chisien tangwa ka Rangdajied United kawa em 10 Point dang em hi ko hakhmat wei daw yaleh ko sa arsien. Ka Niaw Wasa wa Mulait United da em ki mar 9 Point tangwa da tam ka Mulait neidaw wa da dep jop ko ya ka Niaw Wasa.
Ha Shillong won ya ki 11 tylli ki kool ka Langsning da thap da u Dauruhipaia Pale (8′, 83′, 88′) wa u Ambilstar Sun (29′, 48′, 50′) kiwa da yoh Hat-Trick wei kiwa sah ki kool da thap da u Kynsaibor Lhuid (18′, 78′), u Wilbert Marbaniang (64′, 90’+1) wa u Fedrick Wahlang (89′). Ka Langsning kattu da yoh ko 9 Point hadien soo tylli ki yalehke katwa ka Mawlai won da em ko 12 Point hadien soo tylli ki yalehke.
Mynstep daw em du kawi ka yalehke katæ ha Jowai hapyrdi ka Rangdajied United waka Mulait United heipor 2:30 i sngi.
