Ka Shillong Lajong da yoh ko yei jop wa ar ha ka Group E ka Meghalaya State League 2024 deiwa jop ya ka Seinbhalang Shktentalang da 6-2 ha Wahiajer ynne deiwa yoh Hat-Trick u Kynsaibor Lhuid.
U Kynsai da thap u ha ka minit wa 18, 37 wa 90’+5 katwa ya ka kool nyngkong da thap u Abhay Chettri ha ka minit wa 3 wa ki ar kool na u Deibormame Tongper ha ka minit wa 16 wa 20. Ya ka Shktentalang da thap da u Tip Rasmut ha ka minit wa 36 wa u Teibormi Tariang ha ka minit wa 71.
Ha ka Group B, ka Sutnga da wan ko nadien yow jop ya ka Riangdo Youth da 4-1. Ka Riangdo da thap ko nyngkong lyngba u Batskhemlang Thongnirit ha ka minit wa 3 tangwa ka Sutnga da yoh ko wow thap lyngba u Skhemborlang Rupai (35’), u Raplangki Lyngdoh (54’), u Cheerfulness Shadap (77’) wa u Deligent Pdang (90’+4).
Ha ka Group C wa da pynman hei sien nyngkong ha Tyrsad, ka Ladthadlaboh da jop ko da 1-0 ya ka Mawlum Tyrsad kawa da thap da u Rangdajied Sayoo ha ka minit wa 20.
Ha Khliehriat, kawa pynman ya ka Group D, da kut ka yalehke da 0-0 hapyrdi ka Mulait United wa ka Iatyllilang Lumsehkot Raliang katwa ha ka Group F da jop ka Pynursla ya ka Patharkhmah kawa pynman ha Shillong da ki kool wa thap u Riborlang Dkhar (44’, 90’).
Mystep daw em kawi donhi ka yalehke hapyrdi ka Mawtari Myrdon waka 7 Wasa United ka Group E ha Wahiajer, kawa daw sdang heipor 2:00 waje i sngi.
Ka Result ynne ka sngi:
Group A (Tura): Pinggera Do’gisik 1 – 2 Lumsohkhlur
Group B (Mawkyrwat): Sutnga 4 – 1 Riangdo Youth
Group C (Tyrsad): Mawlum Tyrsad 0 – 1 Ladthadlaboh
Group D (Khliehriat): Mulait United 0 – 0 Iatyllilang Lumsehkot Raliang
Group E (Wahiajer): Shillong Lajong 6 – 2 Seinbhalang Shktentalang
Group F (Shillong): Pynursla United 2 – 0 Patharkhmah
Discussion about this post