Ka Nangkiew Shaphrang Lumdiengngan da yoh ko yei jop wa nyngkong ha ka Meghalaya State League 2024 da 3-1 deiwa pynrem ya ka Mawlum Tyrsad ha Group C wa da pynman ha Tyrsad ynnin ka sngi.
Ka Lumdiengngan da yoh ko u thap lyngba u Kitboklang Sohtun (6′, 64′) wa u Pynkupborlang Kharbhih (58′) katwa ya ka Mawlum Tyrsad da thap lyngba u Banshem Khongsit (4′).
Kani da man ko leh du kani ka yalehke wa da pynman ynnin.
Ka Lumdiengngan da ku ko chei wa ar hapoh ka Group C deiwa em 3 Point iwa kat jooh wa ka Seven United tangwa da tam deiwa kheiñ ya ka Goal Difference (0-2) wei daw yachem ki ha ka 7 tarik yow tip kiyi wow lai chakhmat.
Kiwa da yoh u psiah Quarter Final toh ka Ladthadlaboh na Group C, ka Shillong Lajong na ka Group E wa ka Mawlai na Group F.
Myntu daw em soo tylli ki yalehke kiwa man leh ki khaddooh ha jar jiar ki Group ki. Ha Tura ka Pinggera Do·gisik daw yachem ko wa ka Chipakkore heipor 5:30 ha PA Sangma Stadium. Ka Chipakkore da yoh ko 4 Point wei ye ko wow ku chei nyngkong ha ka Group A lada jop ko. Ka Lumsohkhlur toh kawa em hei nyngkong deiwa yoh 6 Point katwa ka Pinggera Do·gisik da yoh ko 3 Point.
Ha ka Group B, da em ar tylli ki liang kiwa yoh mar 6 Point, kitæ ka Khliehmawlieh wa Sutnga. Ka Sutnga da tam ko da ka Goal Difference (+6 to +1), tangwa ka Khliehmawlieh won da dep jop ko ya ka Sutnga. Lada ka Mawten (3 Point) jop ko myntu pyrchah ya ka Riangdo Youth, daw em le tylli ki Team wa yaknieh yei yoh nyngkong.
Ha Khliehriat, ka Rymbai Skhenshynriah emkaam u jop ko deiwa tam da 6 kool pyrchah ya ka Mulait United yow ye u pyntam ya ka Rangdajied United ha ka Group D. Ka Rangdajied wa Rymbai Skhenshynriah hei yachem ki da kut da 0-0 wei ka RUFC kattæ da em ko 7 Point deilang ka Goal Difference wa +10 katwa ka Rymbai Skhenshynriah da em ko 4 Point deiwa em ka Goal Difference wa +5.
Ha Shillong, ka Pynursla United daw yachem ko wa ka Seng Samla Mawmluh wei kini waroh ar toh kiwa yaknieh wow yoh wa ar wei ka Goal Differences ki toh -9 (Pynursla) wa -14 (Mawmluh) tangwa da eh u yoh ki u psiah Quarter Final.
Ki yalehke myntu:
Group A (Tura): Pinggera Do·gisik vs Chipakkore, 5:30pm
Group B (Mawkyrwat): Riango Youth vs Mawten, 2pm
Group C (Tyrsad): Ym pynman
Group D (Khliehriat): Mulait United vs Rymbai Skhenshynriah, 2pm
Group E (Wahiajer): Da pyndep ya ki yalehke
Group F (Shillong): Pynursla United vs Seng Samla Mawmluh, 2pm
Discussion about this post