Ka Rymbai Shkenshynriah deiwa thap ar tylli ki kool ha ka kylla miet da jop ko ya ka Chipakkore da 2-0 ha ka yalehke Quarter Final wa khaddooh ka Meghalaya State League 2024 wa da pynman ha PA Sangma Stadium, Tura ynne.
Ya kini ki kool da thap da u H. Rymbai (68′) wa u I. Bareh (79′) ha ka yalehke wa khor bha.
Ka R. Shkenshynriah da ini i jop da yoh ko u psiah Semi Final deilang ka Shillong Lajong, Ladthadlaboh wa Mawlai wei ki tarik yalehke daw pynbna won hadien da ka Tournament Committee.
Kam wow pynkynmoo wa nadooh wa sdang da em 24 tylli ki Team na waroh soodong ka Meghalaya wei da sah ar tylli kiwa na Shillong (Lajong wa Mawlai), kawi na West Jaiñtia Hills (Ladthadlaboh) wa kawi na East Jaiñtia Hills (R. Shkenshynriah).
Na kini, du ka Lajong waka Mawlai kiwa da psiah Semi Final ha ka MSL nachwa wei ka Lajong da man ko kam ka Champion ha u 2019. Ka 7 Wasa United da jop ko ya kawa nyngkong dooh ha u 2018 katwa ka Rangdajied kawa le wa jop ha u 2023.
Discussion about this post