Ka Chipakkore da yoh ko wow psiah Quarter Final ha ka Meghalaya State League deiwa jop ya ka Pinggera Do·gisik da 3-2 ha ka yalehke wa khaddooh ka Group A wa da pynman ha Tura ynne i janmiet.
Da ini i jop ka Chipakkore, da yoh nyngkong ko deiwa yoh 7 Point katwa ka Lumsohkhlur da hiar ko cha wa ar deiwa yoh 6 Point.
Ha ka Group B won, ka Mawten da jop ko ya ka Riangdo Youth da 3-1 wei da ini ka Mawten, ka Khliehmawlieh wa Sutnga waroh da yoh ki mar 6 Point. Wei neiliang ka Tournament Committee ka MSL daw chim rai ko kiwon wow yoh nyngkong hadien wa chong yalang ki mynstep.
Ha Khliehriat, ka Rymbai Skhenshynriah da jop ko ya ka Mulait United da 3-0 da ki kool wa thap u Hesmiki Rymbai (39′, 58′) wa u Iaishah Bareh (52′) tangwa ini ym dap i yow yoh nyngkong iwa da ksoh da ka Rangdajied United hanla waroh ar liang da yoh ki mar 7 Point tangwa ka RUFC da tam ko da ka Goal Difference (+10 la +8). Ini i ym em ktah ko ya ka R. Skhenshynriah kawa daw yoh hi wow psiah Quarter Final deiwa yoh wa ar ko.
Ha ka Group F, ka Pynursla United wa Mawmluh da kut ka yalehke ki da 2-2.
Ka yalehke wa khaddooh u pyndep mynstep ha ka Group C heiwa ka Seven United daw yachem ko wa ka Nangkiew Shaphrang Lumdiengngan yow yaknieh yoh wa ar. Kini toh kiwa da yoh mar 4 Point na ar tylli ki yalehke tangwa tam ka Lumdiengngan da ka Goal Difference (0 la -2).
Ki yalehke ka MSL hadien mynstep daw pynsangeh chwa kam chibynta wow pynkhreh ya ka Santosh Trophy.
Ki Result ynne:
Group A (Tura): Pinggera Do·gisik 2 – 3 Chipakkore
Group B (Mawkyrwat): Riango Youth 1 – 3 Mawten
Group C (Tyrsad): Ym em pynman
Group D (Khliehriat): Mulait United 0 – 3 Rymbai Skhenshynriah
Group E (Wahiajer): Da pyndep ya ki yalehke
Group F (Shillong): Pynursla United 2 – 2 Seng Samla Mawmluh
Discussion about this post