Shillong: Ka Khasi Hills Autonomous District Council (KHADC) da mynjur ko yaka mang poisa yong u snem 2020-2021 kawa da poi cha ka T.243.72 klur, khlem da em i pyrchah.
Hawa pynche hajrong i yatai yaka mang poisa, u Chief Executive Member ka KHADC, u Titosstarwell Chyne da ong u wa yaki ar tylli ki Tourist Spot neiliang ka Council wa da booh wow yoh nong wei myntoi, kawi ha Maraikaphon kawa da pynlut T.1 klur kawa sumaar wei pynlai daka KHADC, katwa ya i mih daw saam 65% cha ka KHADC wa 25% cha ka chnong, ya iwi won i thaw uiñke suwari ha Wah Tim ya i mih daw saam marchiteiñ hapyrdi ka chnong waka Council.
Hajrong ka Professional Tax da ong wa da em chwa i booh bai dan kawa sdang nadooh T.200 hadooh T. 2500 neibynta ki kaam wa rap heh, wei ya ini da booh katkam ki aiñ wei ym ye u pynkylla. Katwa neibynta wow pynkrehkaam yaka Special Assistant, yaka poisa da phah wow pynlut 50% neibynta ki kaam pynroi ha ki chnong wa 50% neibynta i khooid i suba waka umbaam.
U CEM da ong u leh wa hajrong i thmu wow pynpsiah ya i ktien Khasi haka 8th Schedule, ka KHADC daw e yarap ko wow pynmih kawi ka Dictionary Khasi, khnang wow pynkhlan ya i dawa pynpsiah næ i tipmit noh haka 8th Schedule.
U CEM da ong u leh wa ka Council da pynkhreh ko wow pynkhlan noh yaka Judicial Wing, da i thmu wow pynkhlan ya i bichaar chadooh ki chnong nongkyndong wei daw wai yaka kashari ka Council ha Nongstoin wa Nongpoh, wei daw pyrchang leh cha kiwi ki thaw wow pynsuk yaki paidbah wa ym emkaam wow wan de chadooh Shillong.
Hawa yatoh wa i chna yaka Police Outpost ha Langpih, u CEM da pynche u wa ka KHADC ye ko wow yarap yaka sorkar neibynta wow chna ya katai ka Outpost wow chong ki pulit ka jylla neibynta wow yada nei chah pynthut ki paidbah haka Asssam. Chooh chooh da ong wa neibynta wow kyntu ya i pynmih phlim Khasi, ka Council ym em ko yei eh wow chna ya kawi ka Hall næ Cinema lada yoh ya i thaw.
Ha kani ka sngi kut yong ka dorbar lyiur ka KHADC, da pdiang leh yaki le tylli ki Bill kiwa da wanrah da ka Executive Committee khlem em iwon iwon i pynkylla, kini ki Bill kynthup ki yaka Khasi Hills Autonomous Distrcit (Allotment, Ocupation, or Use or Setting apart of Land) Regulation Bill, 2020, ka Khasi Hills Autonomous Distrcit (Regulation and Adminstration of Land) Bill, 2020 waka Khasi Hills Autonomous Distrcit (Solid Waste Management) Bill, 2020. Ha kani ka sngi ka yung dorbar da pdiang ko leh yaka United Khasi-Jaintia Hills Autonomous Distrcit (Trading By Non Tribal’s) (Tenth Amendment) Regulation Bill, 2020.
Ka yung dorbar da pdiang ko ya kitai ki Bill waroh khlem em iwon iwon i yatai hapoh ka yung dorbar, u Gabriel Wahlang MDC yong ka Nongstoin naka seiñ Congress da wanrah u ya i pynkylla hawa yatoh waka Khasi Hills Autonomous Distrcit (Allotment, Ocupation, or Use or Setting apart of Land) Regulation Bill, 2020, tangwa da pyndam noh u ya i wanrah yei pynkylla.
