Jowai: U Lber Laloo uwa yaleh mukotduma haka Supreme Court nadooh u snem 2015 yow pynlait ya ka jylla Meghalaya na ki aiñ wa yatoh wa u mooyong yow yoh biang u tih mooyong kamwa jooh hapoh ka jylla da pyntip u wa da sdang mih soh kani ka yaleh yong oo.
Da ong u wa lyngba ki muktiar da pyntip ki cha ka Supreme Court wa ka Ministry of Coal hun hi ko wow pynlait ya ka Meghalaya nei krehkaam ka aiñ Coal Mine (Nationalisation) (CMN) Act 1973 waka Mines and Minerals (Development and Regulation) (MMDR) Act, 1957 lyngba ka Presidential Notification hapoh ka Paragraph 12A(b) ka Sixth Schedule ka riti synchaar ka ri.
Ha ka chithi wa thoh ka Ministry of Coal cha u Joint Secretary (North East) ka Ministry of Home Affairs kawa nadooh ka 10-08-2015 da pyntip wa ha ka 22-09-14 da em ka yalang ki montri ka sorkar Meghalaya wa ki sahep ka Ministry of Coal heiwa da chim ya ka rai wa ka sorkar jylla u thoh ko cha ka Ministry of Mine yow pynlait ya ka Meghalaya na ka aiñ MMDR hapoh ka Para 12A(b) ka Sixth Schedule kawa da pynkrehkaam da kiwi ki sorkar warim wei wow pait lang ya ini da ka Department of Legal Affairs.
Kamjooh ka sorkar Meghalaya leh u thoh ko cha ka Ministry of Coal yow pynlait ya aiñ CMN deiwa krehlang wa ka Department of Legal Affairs.
Tangwa ka sorkar Meghalaya won ha i rai wa chim ko hapoh ka dorbar chna aiñ da rai ki wow phah pyndam syndon ya waroh ki kyndon ka aiñ CMN Act waka MMDR Act wow krehkaam ki hapoh ka jylla.
Kamtæ ha kani ka chithi da ong wa neidaw waka MMDR Act toh kawa pait ya waroh ki mar pohkhyndaw kawa pynkrehkaam da ka Ministry of Mines kamtæ ka Ministry of Coal ymye ko u chim ya ka rai samen katkam wa kwah ka sorkar Meghalaya wow pyndooh noh ya waroh ki kyndon kani ka aiñ wow krehkaam ki hapoh Meghalaya wei ka Ministry of Coal ye ko u chim ya ka rai du ya u mooyong wa u Lignite.
Yow ye u leh ya ini emkaam wow ya krehlang waka Ministry of Mines wa ka Ministry of Home Affairs.
Neiliang ka Ministry of Coal da ong ko heiyatoh wa u mooyong wa u Lignite wa ye ko u chim ya ka rai, mynjur ko wow pynlait ya ka Meghalaya na ka aiñ MMDR Act waka CMN Act wei chong ha ka Ministry of Home Affairs wow chim ya ka rai heiyatoh wa kiwi ki mar pohkhyndaw wa em hapoh ka aiñ MMDR.
Neiliang u Lber Laloo da ong u manda ye u pyndam ya kini ki ar tylli ki aiñ daw chong ko kattu ha ka sorkar jylla wow chna da ki yong ka hi ki aiñ yow tih mooyong katkam ka juk wa katni wei u yoh biang ki paidbah u mantre ya ka thaw yong ki kamjooh waroh kiwa em hapoh khyndaw.
Ya ka mukotduma u chong bichaar biang ha kani ka 15 tarik uni u bnai.
Discussion about this post