Mynjur ka sorkar pyrdi ya u sarok High-Speed Corridor uwa nadooh na Meghalaya cha Assam

Ka sorkar pyrdi ha ka yachem ki Montri ka sorkar pyrdi ynne hei pynlai u Prime Minister, u Narendra Modi, da mynjur ki yei chna ya u sarok High-Speed Corridor u wow sdang nadooh Mawlyngkhung (hajan Shillong), Meghalaya hadooh ha Panchgram (hajan Silchar), Assam deiwa leh da ka Hybrid Annuity Model kawa sariem kam ka Public-Private Partnership.

Uni u sarok toh uwa jrong 166.80 Km (NH-6) heiwa 144.80 Km toh uwa em ha Meghalaya katwa 22 Km won uwa haap hapoh Assam.

I lut wow chna ya uni u sarok dapoi hadooh Rs. 22,864 klur.

Uni u sarok daw pynsuk u ya kiwa lai Guwahati-Shillong-Silchar wei uni u sarok daw lai luti u na Ri-Bhoi, East Khasi Hills, West Jaiñtia Hills, East Jaiñtia Hills ka Meghalaya wa na Cachar District ka Assam.

Uni u sarok daw yabi u leh wa u NH-27, NH-106, NH-206, NH-37 yow pynsuk yei lai cha Guwahati- Shillong, Silchar, Diengpasoh, Ummulong, Phramer, Khliehriat, Ratacherra, Umkiang wa Kalain.

Related posts

Tkut waroh ki chaka dien ka Truck kawa noh na yingkieñ chapoh ka wah

January 11, 2026

Khut ka kur Pale ya ki khon ka kur wa lehbha hei puræ puthi yow pynkup burom

January 11, 2026

Uni u sarok daw yarap u leh wow pynduna yei khynnia u sarok NH-6 iwa daw pynsuk leh ya kiwa lai cha Tripura, Mizoram, Manipur wa ka Barak Valley ka Assam.

U Modi da ong u wa uni u sarok daw yarap u leh wow pynku ya ka khayi pateiñ wei yow mih ki karkhana ha Meghalaya kamjooh yow pynyabi ya ki thaw uiñke suwari ka thaaiñ North East.