Ka sorkar jylla da mynjur ko wow pynkrehkaam noh ya ka aiñ Bharatiya Nagarik Suraksha Sanhita (BNSS) 2023, nadooh ka 1 tarik u Naiynñiaw uni u snem katkam wa phah ka sorkar pyrdi yow kylliang noh ya ka Code of Criminal Procedures (CrPC).
U Paul Lyngdoh da khana u wa ha ka yalang yong ki Montri sorkar da chim ya ka rai hadien wa da yoh yeiwa phah ka sorkar India yow pynkrehkaam noh nadooh u bnai wow wan.
U Cyril V Diengdoh (IAS), Secretary Law and Parliamentary Affairs yong ka sorkar jylla da ong u wa man iwa emkaam wow pynkrehkaam noh ya ka BNSS khnang wa ki yung bichaar u ye ki wow pynkrehkaam noh da kani ka aiñ hawa bichaar ya ki mukotduma ki kaam damok wa pyrchah aiñ heithaw ka CrPC.
Da ong u leh wa kani ka BNSS daw pynkrehkaam noh ka ha waroh ki yung bichaar, tangwa kani ka BNSS ym krehkaam ko ha ki yung bichaar ki Autonomous District Council kiwa haap hapoh ka Sixth Schedule neibhah ki em ki ka yong ki hi ka kyndon katkam ha ka Para (4) wa Para (5) ka riti synchaar ka ri.
Ka BNSS toh ka aiñ thymme kawa da mih heithaw ka CrPC, wei i thmu toh yow pynlait nei kyllaiñ ki kyndon, wow pynkhlan yei takit ha ki bor ki pulit, wow pynkrehkaam leh ya ka aiñ deiwa boh por yow lait nei pynslem wei wow pynrkhiñ yow lait nei leh ya ki kaam wa sih.
Kawi won wa da mynjur da ki Montri sorkar toh yow phah pynkrehkaam ya ka Forensic Crime Scenes Investigation (FCSI) kawa yatoh wa ka aiñ BNSS. Wei katkam ka BNSS i pynchitom ya kiwa yaleh ya ki kaam wa sih wa chyrkhei toh deiwa chah kset patok da 7 snem chaneiñ.
Hajrong ini, u Paul Lyngdoh da ong u wa ka sorkar daw booh ko ya ki kari Forensic ha waroh kawi ka jylla, ki wow phet wow lum ya ki nongmuna wa ki sabut satar ha ki thaw wa em iwa jia.
Katkam kani ka aiñ, ki bru Forensic toh u lai pait ki yei thaw jia ki kaam pyrchah aiñ.
Discussion about this post