U Montri Rangbah ka Meghalaya, u Conrad K. Sangma ynne da yachem u wa ki dkhot ka Khasi Students Union (KSU), deiwa emlang u Symbood Montri Rangbah, u Prestone Tynsong yow yaklam heiyatoh wa ka aiñ Meghalaya State Investment Promotion & Facilitation Act, 2024.
Kani ka aiñ toh kawa da pynkrehkaam ha u Wisu (Mar) 2024, dei thmu wow pynchlur ya kiwa wan seiñ khih seiñ karkhana hapoh Meghalaya. Wei hadien wa da pynsñiaw kiwa boon yei artatien yeini, ka sorkar da pynkhreh ko wow pynkylla ya kani ka aiñ yow lait ko wow ktah yei bor ka aiñ The Meghalaya Transfer of Land (Regulation) Act, 1971 kamjooh wow lai lait ya ki District Council.
U Conrad da kular u wa kini ki kyndon wow pynkylla toh yow lait u ktah ko ya kawon kawon ka kyndon ka aiñ The Meghalaya Transfer of Land (Regulation) Act, 1971. U pyntikna leh wym ye kani ka aiñ u lai lait yei bor ki Autonomous District Council.
Sa iwi u pyntikna leh wa i yoh kreh u man ko 90% ya ki tre chnong ha ki jait kreh wa man kam ki Non-Managerial wa 50% won ha ki jait Managerial manda em kiwa wan seiñ khih seiñ kreh wei wai karkhana hapoh kani ka aiñ.
U Conrad da ong u wa manda pynkylla ya kani ka aiñ Meghalaya State Investment Promotion & Facilitation Act, 2024 daw pyntikna wa yoh myntoi ka jylla kamjooh leh u yada ya kiwa chong chnong.
Da ong u leh wa ka sorkar u pteiñ ko u yaklam wa kiwon kiwon ki seiñ, nadooh kiwa pynlai chnong, pynlai Elaka wa kiwi de yow yada yei hok ki tre chnong ka jylla.
Chooh chooh da ong u wa kam ka sorkar da booh ko hakhmat yeiwa emkaam ki paidbah wei yeini da leh yow pynmih kreh ya kiwa chong chnong deiwa wan kiwa seiñ khih iwa daw pynheh pynsan wei wanrah ya ka roi ka paar hapoh ka jylla.
Discussion about this post