Ka sorkar Meghalaya ha ka yachemlang ki Montri sorkar namo ka Cabinet Meeting wa da pynman ynne ka sngi da chim rai ko wow thied kattu katni ki thaw yow wanrah ki kaam pynroi.
Iwi toh wow thied thaw yow e salan cha ki chipai yow pynheh ya ka Shillong Airport yow ye ki lieñsuiñ wa heh wow hiar ha kani ka Aiport.
U Montri Rangbah ka jylla, u Conrad Sangma da ong u wa deiwa yaklam wa kiwa chong chnong deilang ki waheh chnong, neiliang u Deputy Chief Minister, u Sniawbhalang Dhar uwa pait leh ya ka chnat Transport da pynkit ha oo wow rah yeini i kaam chakhmat neibhah ka khut Tender da lai ko chakhmat iwa mut leh neiliang ka sorkar da mynjur ko wow leh yeini.
Kawi won toh yow mynjur u thied thaw neibynta wow chna ya ki thaw wa yatoh wa ki kaam uiñke suwari ha Umpardong, Umden ha Ri-Bhoi District.
U Conrad da pyntip u leh wa da mynjur wow pynlait ₹50 klur yow chna ya u sarok na Nongpoh cha Umden heiwa ka chnong Umden da tip ya ka kam ka Silk Village kawa da khriñ ya kiwa boon ki bru wei da em i dawa wow pynbiang hadooh ki thaw sah wei ka sorkar u thied thaw ko yow chna ya kini kamjooh kiwi de kiwa emkaam.
Sa iwi wa da mynjur toh yow thied ya ki lyngkha ha Mawkhanu, New Shillong Township yow pynheh ya ka New Shillong Township.
U Conrad da ong u wa nachwa kini ki lyngkha toh kiwa em ha kiwa boon ki thaw wei kiwa rep ym bien ki wow dai ki tangwa deiwa yoo ki yeiwa da chna da tei ka sorkar ha kini ki thaw, da em 17 ngut kiwa rep kiwa da mynjur wow dai yei thaw ki cha ka sorkar.
Discussion about this post