Ka sorkar jylla ha ka yachem ki Montri sorkar ynne da chim ko san tylli ki rai wa emkaam nadooh kiwa yatoh wa i chait i khiah, ki thaw ki bhaw, i thung kreh wa kiwi de.
U Montri Rangbah ka jylla, u Conrad Sangma hawa pyntip u chaphang kini ki rai da ong u wa da em i rai wa da sahteiñ heiyatoh wa ki Bonded Nurse wa kiwa kreh Paramedical kiwa da thung nadooh u snem 2008 hadooh u snem 2012. Da pyntip u wa da em kamwa 221 ngut kiwa kreh kam ki Bonded Nurse ha ini i por deilang ki Paramedical kiwa dadep thung kreh hadien u 2007 kiwa da thoh u pynbna Advertisement deiwi neidaw wa em i sñiawkhia yei rukom thung kreh ki wa ye u man wa leh khlem da bood ya ki kyndon.
Tangwa hadien wa dadep yaklam bniah yeini deilang wa ka Health Department wei deiwa ap leh yei pynsñiaw ki Bonded Nurse, heiwa da chem wa da bood ya ki kyndon hawa thung kreh ki ha itu i por, kamtæ da rai wow tipmit noh yeini i thung kreh wei ym khut yaleh kreh de deiwi hadien wa da rai wow tipmit noh ki.
Heiyatoh wa ka Meghalaya Pharmacist Service Rules, da ong u wa kani nachwa ym em ko hapoh ka jylla wei da mynjur noh ka deilang ka Meghalaya Mental Health Care Rules, ka Meghalaya Judicial Service Rules, 2006 wa ka Meghalaya Higher Judicial Service Rules, 2015 wei kani toh chaphang i pynman Exam, ki Syllabus, i rukom thung kreh heiwa da hap wow tip ya ka ktien Khasi næ Garo hawa yaleh kreh.
Sa kawi ka rai toh yow pynthymme yei e wai ya ki thaw sorkar heiwa da em boon ki thaw wa em ha Shillong wa chajan wei kini da hap ki wow pynthymme yei chim wai man ka 30 snem wei kattæ i rukom pynthymme toh iwa jrong bha neibhah wa hap wow lai lyngba ka sorkar tangwa kattu da e bor ha ki DC wow leh yeini yow lait u pynslem.
Discussion about this post