Ka sorkar jylla ynne ka sngi da rai ko wow pynkhlan chooh chooh ya ka aiñ kiwa wan mylla na baar jylla kawa tip kam ka Meghalaya Identification, Registration (Safety and Security) of Migrant Workers Act, 2020.
Hawa klam hadien ka yalang ka dhab ki Montri sorkar, u Montri uwa man leh kam uwa e ktien ka sorkar MDA-II, u Paul Lyngdoh da ong u wa ka sorkar da wanrah ko yeini i pynkylla namo ka Amendment neibynta wow pynbha chooh chooh ya ka aiñ kawa da em chwa khnang yow ye u paitbniah ya kiwa mylla kiwa wan na baar ka jylla wei wow pyntikna wa du ki bru ki wym ki dak wa sih ki wym jooh em leh ya ki kaam damok wa daw yoh ki wow wan mylla chapoh ka jylla.
Da ong u wa ka sorkar jylla daw pynkrehkaam ko leh ya ka Crime and Criminal Tracking Network System (CCTNS), yong ka sorkar pyrdi yow tip wa kiwa wan mylla toh kiwa man kammon, wei du kitu ki wym em dak em pyrtuid ha ka aiñ u yoh ki wow wan kreh mylla. Da ong u wa ki pulit lyngba ka CCTNS daw ye ki wow tipmit wei u tip kammon ki bru wa wan mylla cha kani ka jylla, wei neibynta ini leh daw em ka ya krehlang hapyrdi ki pulit waka chnat Labour yow pynlang pynlum yei pyrtuid kiwa wan kreh mylla na baar jylla.
Heijooh i por u Paul da khana u wa ka dhab ki Montri hapoh kani ka aiñ da mynjur leh wow pynku noh ya ka kuna ya kitu ki Contractor kiwa wan yah pyrchah aiñ ya ki baar jylla, heiwa da pyntip wa hadooh kattæ ka kuna man ko du Rs. 5000, wei da kani ka rai yong ka sorkar ka kuna daw man ko Rs. 1 lak neibynta uwi uwa mylla wei ka kset patok kawa hadooh 3 bnai ya kitu kiwa pteiñ wow tyngkheiñ aiñ boonsien.
Discussion about this post