Ka sorkar jylla ynne hapoh ka Cabinet Meeting kam chibynta wow pynkrehkaam wei pynkhlan ya ki le tylli ki aiñ (Criminal Laws) katkam wa da phah da ka Ministry of Home Affairs wei deiwa yoh leh yei mynjur ka High Court ka Meghalaya neibynta ka Bharatiya Nyaya Sanhita (BNS), Bharatiya Nagrik Suraksha Sanhita (BNSS) wa Bharatiya Sakshya Adhiniyam (BSA), da mynjur wow pynkrehkaam ya le tylli ki Rules wa thymme:
Kawa nyngkong toh ka Meghalaya eSakshya Management Rules, 2025, wei lyngba kani waroh ki sabut kiwa man kam ki dur ki dar, ki Video wa kiwi de kiwa man ki kynja Electronic Format daw ye u Upload ki deiwa pynemkaam da ka Mobile Application wa tip kam ka eSakshya, kawa ye u khang u wai deiwa pynemkaam da u 16 Digit Code wa da pynyabi waka CCTNS & ICJS System. Deiwa leh kamni daw pyntikna wym em kiwa ye wow pynkylla pynchna ya kini ki sabut.
Da mynjur leh ya ka Meghalaya Electronic Processes, Issuance, Service and Execution Rules 2025 hapoh ka Section 64 ka Bharatiya Nagrik Suraksha Sanhita (BNSS). Kani toh kawa e laad wow phah ya ki kot ki sla wow wan hajir hakhmat ka yung bichaar, ki pulit deiwa phah da ki e-Summons kiwa man da ka Electronic Format.
Kawa le wa da mynjur toh ka Meghalaya Guidelines for Community Services 2025.
Lyngba kani, ki yung bichaar kattu ye ki wow phah pynchitom ya kitu kiwa leh ya ki kaam pyrchah aiñ wa khian wa nai deiwa phah leh da ki Community Service iwa ye u man deiwa phah lai yarap wow pynkhooid ya ka Hospital, u yarap u pynlang pynbait ya ki kot ki sla ha ki Library ka sorkar, u lai pynkhooid ya ki yung skur, u yarap ya ka Municipal wow pynkhooid jhep, u chimbynta wa ka Forest Department wow thung dieñ wei wow phut ranem.
Discussion about this post