Ka mukotduma wa da yaleh da ka Synjuk Ki Waheh Chnong Jowai pyrchah ya ka Jowai Municipal Board (JMB) da chong bichaar biang ya ka ynnin ka 7 tarik heiwa da pyntip cha ka Meghalaya High Court wa da mynjur ka synuk waka JMB wow pynkylla noh yei rukom pynbait yei por lai kit jhep hadien wa da pynman ya ka yalang ha ka 26-05-23.
Da mynjur wa ki waheh chnong u jied ki ar næ le tylli ki thaw ha kawi ka dong kam i thaw yang ki Truck ka Municipal ya kiwa chong chnong yow wan e kti ki yei jhep ki wei yeini toh u pyndep chwa ka 31 tarik u Naisan 2023.
Najrong ini, kawi pa kawi ka dong toh u jied ki u bru wow booh da ka Register yow chim yukheiñ lada wan namo ym em wan ki Truck ka Municipal kamwa da booh sngi booh por.
Da pyntip leh cha ka yung bichaar wa ki waheh chnong yong waroh ki dong ha Jowai u pynbait ki yei rukom pynkhlaad ya ki Plastic yow e won cha ka Municipal wei lada em iwon iwon iwa emkaam u pyntip cha kiwa chong chnong ka Jowai, ka Municipal u phah bait ko lyngba u President namo u Secretary ka synjuk.
Ka yung bichaar da ong ko leh wa ka synjuk toh u chim ko yei kitkhlieh yow pyntikna wa ka Municipal bood ko yeiwa pynbait yow lait kiwa chong chnong u chitom kat wym pu dep u chna ya ka thaw noh jhep.
Ya ka mukotduma u chong bichaar biang ha ka 05-06-23.
