Shillong: Ka Central Executive Committee yong ka United Democratic Party da rai ko wow kyrchaan ya ka rai yong ka UDP na Shella Circle wow pynyakhun da u khon yong u MLA wa da khlaad noh, u Dr. Donkupar Roy ha ka Election chiteiñ samoi kawa daw pynman.
Kam wow pynkynmoo wa kiwa ha yung hasem yong u Dr. Donkupar uwa man leh u Lamphang wa heijooh i por u Presdient Rangbah ka UDP da mynjur ki wow phah ya u khon, u Balajied Synrem wow yakhun ya ka Election MLA chiteiñ samoi hadien wa khlaad noh u pa u.
“I kyrchaan i yaka rai yong ka Shella Circle wow sai da u khon yong u MLA uwa da jop 7 sien khlem rem ha ka Election chiteiñ samoi, ki da dep ki leh wow yaklam wa ka yung u Dr. Don hajrong kani ka kaam,” da ong u Working President ka UDP, u Bindo M Lanong.
Uwa yahkhmat ka UDP da ong u leh wa hanlada da em ka tyrwa, “Daw yang biang i leh ya ka rai wa khaddooh yong ka General Meeting ka UDP Shella Circle ka wow pynman haka 22 tarik uni u bnai.”
Chooh chooh neiliang kiwa yahkhmat ka UDP da ong leh wa ki kyntu ki ya ki lok wa emlang ha ka sorkar Meghalaya Democratic Alliance (MDA) wow kyrchaan ya u kyrtong ka UDP ha ka Election chiteiñ samoi kam u kyrtong hunlang.
Hawa kylli, lada ki seiñ saiñpyrthai wa emlang ha ka sorkar u pynyieñ ki ki yong ki hi ki kyrtong, neiliang kiwa yahkhmat ka UDP da ong ki wa ym ye u khang ya kawon kawon ka Party wow booh kyrtong. “I daw booh i yaka kyrpaad wa lada toh iwa ye u leh wow kyrchaan lang ya u kyrtong ka Party ha katai ka Election,” ong u Dr. Jemino.
Discussion about this post