Jowai: Ka seiñ All Jaintia Hynniewtrep People United Front (AHPUF), ka da mynjur lang ko hajrong ka nongrim wow pynneh pynsah yow yoh yurim ka ktien ka thylliej yong ka jaitbru.
“Hao ym ye u kyntait wa ka ktien Khasi toh ka ktein wa pynemkaam wei wa wa sniawthooh lang waroh, tangwa u em i ki yong i hi ki dak thoh dak puræ ym man ko wa pyrchah ya ka ktien Khasi næ kawa pynyapher jait bru, ka ktien Khasi ye ko u man kam ka State Language næ ka Official Language yong i, wei wow pynpsiah ya ka ktien Khasi haka Eight Schedule yong ka Riti shynchar ka ri India em ko i yong ka hi i bynta”, ong u secretary ka seiñ u Chandame Sungoh.
Ka ktien Pnar ka da em ko ki kyntien kiwa emkaam da ki yong ka hi kidak thoh dak puræ yow pynwan dur chooh chooh ya kitæ ki kyntien. Kam ka nongmuna da em ka kot dak thoh dak puræ Pnar wa da thoh da u waheh Riquoma Laloo, kawa oo da pynwan dur kyrpang kam u dak æ hei thaw a e yow thoh ya ki kyntien tæ, puræ ter ter, u dak ŋ heithaw n g yow thoh ŋa, ŋait, kamtæ ter ter.
“Ka ktien ka thylliej, ka riam ka beit ka riti ka dustur, khamtam ki dak thoh dak puræ toh ka nongrim yong ka jait bru, ka jait bru wa dooh noh ya kini toh ka jaitbru kawa yap,” ong chooh chooh u Sungoh.
Kamtæ ka seiñ kyntu ko ya ka JHADC yow chim khia ko ya kani ka kaam wei yow khutlang ko wa ki bru prohjabeiñ, ki bru chemphang nei bynta u saindur, u pynjanai ya kitæ ki dak thoh dak puræ.
Ka JHADC wa ki bor sorkar ye ki leh u pynmih ya ki policy nei bynta u pynpsiah ha ki skur wa ki thaw puræ kiwa em hapoh ri-loom Jaiñtia, khnang yow yoh mandoh mansnam ha ki khynnah ki khynroo, khyllood yow tip ki u maya ya i ktein pnar.
Discussion about this post