Shillong: I kynad wa da mih hapyrdi ki khynroo Khasi wa ki baar jylla ynnin ka sngi ha Ichamati da poor smat ko cha nongbah Shillong, wot hapyrdi i pyrchang ka sorkar u kdoh u khoom ya ini deiwa pynkrehkaam da ka Curfew wa i khang ya ki Mobile Internet. Ynne ka sngi da mih syndet i kynad ha Iewduh wei na ini i jia da pynhær syrngu ko ya ki paidbah wa lai wa wan.
Katkam wa pyntip ki pulit ha ini i jia, 10 ngut ki baar jylla da chah pynmynsoo ki heiwa 9 ngut da chah dung ki ha Iewduh wei uwi da chah dat u ha Jaiaw, Langsning uwa tip pyrtuid kam u Akash Ali (21) wei da pynkit ya oo cha Civil Hospital, Shillong katwa u Rupchand Dewan (29) i chnong tre u na Bhela Nawgaon, Borpeta, Assam uwa sah ha Laban Jumma Compound, Hari Sabah da khlaad u heipor wa kit ya oo cha Hospital nei mynsoo joor u.
Ya kiwi kiwa mynsoo da pynkit cha Civil Hospital Shillong kiwa tip pyrtuid kam u u Ajay Kuri (39), Rikesh Das (60), Satya Madak (36), Deepak Kumar (17), Pradeep Kuri (21), Aman Kumar Shah (18), Jadur Choudhry (50) wa u Shuban Nath (18).
Katkam wa pyntip kawi ka manbei kawa chong yaw, da ong ko wa heipor kamwa 10:30 i step da em ki bru wa ym tipmit wa tymmoh yei khmat ki da dung ki ya u Rupchand Dewan (uwa khlaad) wei da yut ki wut na ini i thaw.
Ha kawi tawon ka khubor, ynne ka sngi heipor kamwa 3:20 PM uwi u baar jylla uwa ym tip pyrtuid da chah dat u ha yaw Sohra wei da kit ya oo cha CHC Sohra yow yoh u yei sumaar. Neidaw wa da mynsoo joor u neibynta i khlieh u da kit won ya oo cha Shillong Civil Hospital.
Discussion about this post