Jowai : Katkam ka yutip wa da yoh da ong wa ha ka 25 tarik uni u bnai heipor kamwa 9:10 waje i miet da yoh phone ki pulit heiwa da pyntip wa em kiwa chah dat chah bom ha Umpohwai hajan ka chnong Kdoh-Kule, West Jaiñtia Hills.
Mar ya tip yeini ki pulit na ka Nartiang PIC da lai ki bran bran cha ini i thaw heiwa da chem ya ar ngut ki bru kiwa da mynsoo wei kiwa ym em yongbru.
Hadien wa takit, da chem wa em san ngut ki bru hapoh ka kari wa em u No. ML 04 B 5752 kiwa chong dih kiad hapoh yong ka wei da mih i ya-awri hapyrdi yong ki.
Ha ini i awri u Samuel Nongrum da dung u ya u Arki Kshiar da u naar wa nep wei boom u ki, hadien ini u Mathias Mukhim wa u Kyrmen Nongrum da patah ki ya u Samuel Nongrum cha lait kari katwa u Nowen Marboh da lai yarap u ya u Arki Kshiar.
Hadien ini da kit ya u Samuel Nongrum wa u Arki Kshiar cha Jowai Civil Hospital, Ialong wei da pynkit won ya u Arki Kshiar cha Dr. Norman Tunnel Hospital, Jowai neidaw wa mynsoo joor ware u.
Neiliang ki pulit da register case ki wei dang pynman ki ya i takit hajrong ini wa jia waroh.
Discussion about this post