Kawi ka Truck 12 chaka wa em Number AS-01-NC-3867 da lai tyrrah ko ya soo tylli ki kari khian wa kynthup nadooh ka kari kamai wa ki kari ki bru samen iwa da jia ha ka 11 tarik heipor kamwa 3:00 waje i sngi hakhmat ka Jowai Civil Hospital, Ialong.
Kani ka Truck kawa wan neiliang East Jaiñtia Hills da lai tyrrah nyngkong ko ya ka Taxi waka kari samen wa pynyieñ harood sarok wow psiah cha Civil Hospital wei em leh kiwa em bru hapoh wei hadien da tyrrah ko ya artylli ki kari ki bru samen wa wan neiliang Jowai heiwa kawi da sied chapoh i khloo synrang em ha rood sarok wei da lai yarap ki bru wow sai ya kini kiwa em hapoh kani ka kari kiwa da mynsoo.
Ki bru wa yoo ya ini wa jia da ong ki wa kani ka Truck toh kawa pynhær bha wei da ksoh ki leh ya uni uwa yah uwa da khana wa heipor wa poi u ha ini i thaw da yaleh u wow pynsuki ka ka Truck tangwa ym psiah Gear ko wei manda yooh Brake u leh ym hoi.
Uni uwa yah Truck toh uwa tip kam u Sanju Dkhar (24 snem) uwa na Wapungshnong, East Jaiñtia Hills wei ki kari wa tyrrah u toh kawa em Number ML04-D-3728 (kari samen), ka ML04-C-5811 (Local Taxi) kawa syngkhood won ya kawi ka Taxi wa pynyieñ ha rood ka Hospital katwa ki kari wa wan neiliang Jowai toh ka ML-04D-2753 (kari samen) waka ML-05N-2244 (kari samen) kawa da sied chapoh khloo.
Ha ini i jia da em 8 ngut kiwa da hap kit cha Hospital heiwa kiwa em hapoh ka kari wa sied wa kyntup ya ka Onglangli Lyngdoh wa u Evernest Lakiang da mynsoo joor ki katwa kiwi da mynsoo ki malu mala.
Discussion about this post