Hadooh soo ngut da mynsoo joor ki wa kynthup ya uwa yah hadien wa kawi ka kari Tata Winger kawa chong ki da lai tyrrah ko ya kawi ka Truck wa yieñ harood sarok ha ka chnong Umling, ha ki bynta ka National Highway-06 ha Ri-Bhoi District.
Ini i jia da jia heipor kamwa 1 waje i sngi, heiwa katai ka Tata Winger kawa em ya u Number ML-04C-2807 da lai ko wow tyrrah ya kawi ka truck wa yieñ harood sarok, kawa em ya u Number NL-01AE-7634 wei ha ini i jia uwa yah da mynsoo joor deilang wa le ngut kiwa chong ha ka kari Tata Winger.
Katkam wa da tip hadooh kattæ, ka kari Tata Winger dang wan ko na Guwhati wei da thmu wow lai cha Lumshnong, East Jaiñtia Hills, tangwa da jia noh ini wa sñiawsih.
Ya kiwa da mynsoo da pynkit noh wut wut cha Civil Hospital Nongpoh yow yoh yei sumaar wei neiliang ki pulit ka Nongpoh da pynman ki ya ka takit hajrong ini i jia.
