Jowai : Ha i yatyrrah kari wa jia ynnin ka 15 tarik heipor kamwa 3 waje ha Ialong hajan ka ophis ka Tourist Officer da mynsoo joor le ngut wei yap u wi.
Ha ini i ya tyrrah kari da jia i ha pyrdi ka Maruti 800 wa ka Maruti Van heiwa kani ka Maruti Van da kylla ko dei chrooh. Hapoh kani kani ka Maruti Van em ar ngut ki bru wa tip pyrtuid u Army Sutnga 31 snem wa u Wandame Phawa 14 snem kiwa da mynsoo joor bha.
Hapoh ka Maruti Car em san ngut ki bru tangwa uwa chong ha khmat da mynsoo joor wei da kit chwa ya oo cha Civil Hospital ha Ialong tangwa neidaw wa ong ki ym ye de u yarap ya oo da kit won ya oo cha Dr. Norman Tunnel Hospital, Jowai tangwa da khlad noh u ha chiteiñ luti. Ya u wa khlad da tip pyrtuid ya oo kam u Aplang Chyrmang uwa 49 snem i rta.
U Bandajop Lyngdoh uwa 20 snem wa chong hapoh ka Maruti 800 leh da mynsoo joor u.
Ha ini i ya tyrrah kari ympu tip tre yi wa bakla neibhah ka Maruti 800 toh kawa wan na Jowai yow lai cha liang Ialong katwa ka Maruti Van toh kawa wan neiliang Ialong yow lai cha Jowai tangwa ya tyrrah ki mar dei khmat neilang wa chong u handyman.
Ka Maruti Van da kylla ko rap cha khmat neiwa sangeh ka Maurit 800.
Discussion about this post