Ynne i step da em i ya tyrrah kari heiwa da pyntip cha ki pulit ka Nongstoin heipor kamwa 8:00 waje wa da jia i ha thaaiñ Thiepjaphlang.
Manda lai ki pulit ka Mawshynrut Police Station cha ini i thaw da chem wa i ya tyrrah toh hapyrdi kawi ka Truck 6 chaka wa em Number AS-01AC-6971 kawa lai cheiliang Nongstoin wa kawi ka kari Alto 800 wa em Number ML-05Q- 8480 wei i ya tyrrah man ko mar dei khmat heiwa kani ka Alto da pra ko phrai.
Ya kani ka Alto da yah da u Torich R Marak (58 snem) wei da em hapoh wa ka kurim u, ka Jrybina M. Sangma (51 snem) deilang wa u khon, u Darnel M. Sangma (17 snem) kiwa waroh na Cherangre, Tura, West Garo Hills.
Ya kini kiwa em hapoh ka Alto da kit cha Nongstoin Civil Hospital da ka 108 Ambulance heiwa u manpa da rap mynsoo joor u wei hadien won da kit cha Woodland Hospital, Shillong yow yoh yei sumaar wa rap biang.
Ki pulit da pyntip ki wa uwa yah ya ka Truck da yut u na ini i thaw wei ya waroh ar tylli ki kari da taan ki na ini i thaw wei ka takit dang lai ko chakhmat.
Discussion about this post