I chah pyndik ki Khasi Pnar wa im ha Bangladesh da jia i dei langær heiwa ha kani ka kynti da em hadooh kamwa 10 ngut kiwa mynsoo hadien wa chah dat ki ha ki nong Bangladesh.
Katkam wa man hi ki thaw ha kiwa boon ki chnong wa chong sah ki Khasi Pnar toh kiwa pynemkaam da ki Khasi Pnar da ki spah snem ha Bangladesh wei hadien wa sdang i kyntoor pood ki nong Bangladesh neiliang ki Khasi Pnar da yaleh mukotduma ki heiwa ka yung kasari da rai jop ko ya ki bru Khasi Pnar.
Da ong wa mar hadien wa mih kani ka rai na ka Kasari, da sdang pynawri ki nong Bangladesh ha Duluchora la kamwa chi tayaw tam kattu heiwa da chah pam da ki hajar tylli ki tre pathi.
Ka yutip wa tikna da ong ko leh wa hadien ini, da em ki paidbah na ka chnong Kuki, Belwa wa Panai kiwa da lai e yarap ya kiwa chong chnong ha Duluchera tangwa mar yoo yeini neiliang ki nong Bangladesh da ksohnood ki yeini i wan yarap.
Kini ki chnong toh kiwa em hapoh ka Kormoda Union yong ka Kulawra Sub-District hapoh ka Moulvibazar District.
Ha ka 27 tarik uni u bnai ha Belwa heipor wa dang lai yaw ki tre chnong wei wow lai thooh dawai, neiliang ki nong Bangladesh won da yangkhap ki ya ki Khasi Pnar wei da dat ki ki heipor wa liwan ki heiwa kamwa 9-10 ngut da mynsoo ki.
Ynne ka sngi ha yaw ha Luti Punji da chah dat leh sa ar ngut ki bru wa kynthup ya uwi u Khasi Pnar wa uwi u jaitbru Garo.
Hawa yaklam wa ki kattu katni ngut ki Khasi Pnar ha Bangladesh hapoh Moulvibazar, da dap ki dei tieñ wei chong syir neibhah wa ka sorkar wot ki bor pulit leh ymye ki wow e sonteri ya ki.
Ynne ka sngi neiliang ka seiñ kiwa pait ya ki jaitbru Ri-loom, namo ka Greater Sylhet Adivasi Forum, Khasi Social Council, KSU-Bangladesh wa kiwi kiwi, da lai yachem ki wa kini ki bru kiwa da chah ktah ha ini i jia.
