Ynne i step da em i pdung bomb haka thaw psiah (Main Gate) ka thaw sumaar wa paaw ka Manipur kawa tip kam ka Regional Institute of Medical Sciences (RIMS), Imphal hapyrdi wa em leh ka lehkmen yaka Ningol Chakouba Festival ha ka kylleiñ ka jylla heiwa da mynsoo ki arngut ki chi kurim.
U Deputy General of Police (DIG) u Themthing Ngashangva da beiñ u ya ini i kaam kiwa mang wow pynmynsoo yaki bru paidbah.
Da suba wa i jait tympdung IED da pdung i ynne i step heipor kamwa 9:30 hakhmat ka RIMS Main Gate kawa neiliang Lamphelpat, da pyntip ki pulit.
Ki chi kurim da tip kam u Papao Guite (42 snem) waka kurim u ka Hoipi Guite (40) snem.
Ka Hoipi da takha ko naka kjat timun waka kti, katwa u Papao da takha u haka parim kti timun waka kjat timun. Ya kini waroh ar da rah pyn cha ka RIMS Hospital heiwa dang sumaar yaka.
“Ini i pynpdung bomb toh i kaam tieñslah. Da pdung ha i thaw wa boon ki bru wan ki yow yoh sumaar ki ya u COVID-19 khamtam manda jia ha hakhmat ka Hospital, wei ha ini i por wa em ka Ningol Chakkouba, kiwa boon ki pulit da phah pait yaki ha Nga Mela,” da pyntip u Themthing.
Uni u bomb da pdung u heipor wa dang hiar kari ki chi kurim kiwa da wan li booh bru wakjut tangwa da mynsoo ki malu mala donhi wei ym em ki hei maa.
