Williamnagar : Ynne ka 9 tarik da mynsoo palat 9 ngut ki bru hadien wa pdung u bomb ynne i sngi ha ka yaw wa em ha Williamnagar, East Garo Hills. Katkam ki khubor wa da yoh da suba wa ya uni u bomb da pynpdung da ki damok na ki Ri-Loom Garo.
Ki pulit da sdang ki thooh tre ya ki wa em kti heini wei da ker kut ya ini i thaw wa pdung uni u bomb.
Ki pulit da suba ki wa emkti ka Garo National Liberation Army (GNLA) hei pynpdung ya uni u bomb hajan ka wi ka dukan Wine Store kamwa 12:40 ynne ka sngi.
Da ong leh wa uni u bomb ym toh u wa khlan bor hadooh kattæ kattæ (Low Intensity blast) katwa ya ka dukan wa booh ya uni u bomb da pra lut ko. Em i suba leh ini i leh ka GNLA toh kam i dak pynoobor hadien wa da sdang em ki kattu katni ki dkhot ka GNLA wa da wan pyndem ha khmat ka sorkar.
Kiwa mynsoo da tip kam u Andrew R. Marak uwa em 35 snem, u Silvarinba D. Sangma, wa 41 snem, u Jolash Marak, wa 48 snem, Rosel Momin, wa 50 snem, u Jacob Marak, wa 29 snem, u Probit Marak, wa 22 snem, u Pledash Sangma, wa 48 snem, Pisen Sangma wa 72 snem wa u Shyam Sharma, wa 16 snem.
Da yoh leh ya ka khubor wym pu tikna heiwa da ong wa na kini kiwa mynsoo da yap 2 ngut na ki.
Discussion about this post