Ha ka 2 tarik uni u bani hadien wa pynbna wa jop u kyrtong ka UDP na Mowkaiaw, u Nujorki Sungoh kam u MLA, neiliang kiwa kyrchaan u na kylleiñ ka Constituency da wan tooid ki cha chnong Mukhap wow e khublei ya oo hadien wa jop u.
Ha kani ka sngi da em i jia wa sñiawsih heiwa da em i tyrrah kari ha u sarok Laskein-Barato heiwa da wanrah yei mynsoo ki 5 ngut ki bru.
Katkam ka yutip wa yoh, da ong wa kawi ka Truck khian (S Four Wheel) wa em u Number AS-01Q-5986 wa wan na Mukroh chirup wa kiwa kyrchaan u Nujor da yatyrrah ko wa kawi ka Truck wa em u Number AS-01QC-0713 kawa lai cha liang Barato.
Ha ini i jia da mynsoo joor ar ngut na ki san ngut heiwa da kit ya ki cha Jowai Civil Hospital, wa cha Dr. Noman Tunnel Hospital wei katni dang em ki hapyrdi i chah sumaar.
Uwa yah ya ka Truck da wan pyndem u ha ki pulit.
