Ynne ka sngi heipor kamwa 1:30 uwi u bru uwa em chitom hei bor pyrkhat da pynawri u ha u sarokbah ha Phramer, West Jaiñtia Hills heiwa da tympiah u ya ki yit kari wa kamjooh leh da pynmynsoo u ya uwi u bru.
Katkam ka yutip wa da yoh da ong wa uni u bru wa em chitom ya uwa tip kam u L. Swer na East Jaiñtia Hills da wan poi u ha Phramer (neiliang u sarok Shangpung) deiwa ksoh ya kawi ka wait wa ki moo ha kti wei da sdang u wow tympiah ya ki yit ki kari da ki moo wa ka wait.
Hadien kattu katni por uwi u bru uwa tip kam u Aiborlang Suchiang, na Muthlong da lai yaklam (wow kylli neiyi i daw wa leh u kamni) tangwa da chah dung noh u ha u L. Swer.
Ini i jia da wanrah i yei tieñ hapyrdi ki paidbah wei kiwa boon ki dukan da khang noh ki wei ki bor chnong wa ki paidbah da yaleh ki wow ksoh wow kem ya u L. Swer wei heipor wa da ye ki wow yaleh pyrchah ya oo da wan noh ki pulit na ka Traffic Traffic Cell wei da kit noh ya oo cha kani ka yung krehkaam ki pulit.
Ya u Aiborlang da pynkit noh wut-wut cha Jowai Civil Hospital, Ialong heiwa katni da thiah sumaar u ha kani ka Hospital.
Waroh ki kari wa da chah tympiah yit em ki 4 tylli wei kawa da rap joor i chah tympiah toh kawa em u Number M-04C-9909.
Neiliang ki pulit da kit chwa ki ya u L. Swer cha Jowai Civil Hospital wei neini won da pynkit noh ya oo cha MIMHANS wow yoh yei sumaar katkam i chitom yong oo.
