Hadien wa poor ka khubor ha ki rynsan Social Media wa uwi u bru wa tip kam u Chekam A Sangma da mynsoo u hadien wa chah tyrrah ha kawi ka Dumper Truck iwa da jia ynnin i step ha West Garo Hills District heiwa da mih i beiñ wei da chah thang leh ka Dumper Truck ha Bokmagre i thaw wa em hajan Tura ynnin hi heiwa da suba da leh da ki bru kam ka dak wow pynhiar tput neibhah ha ki sngi wa dep da em boon kiwa chah tyrrah ha kini ki Dumper Truck.
Neiliang u SP ka West Garo Hills da pyntip u wa hadien wa dep takit ya u Chekam A Sangma (29 snem) uwa da mynsoo heipor kamwa 2:30 hadooh 3:00 waje i step ha SMELC, da phla u wa ini da jia i heipor wa liwan u da ka Scooty na i yung wa em wa yap bru wei manda yoo u ya kawi ka Dumper Truck wa wan nadien da tieñ u wei da lai u cha rood heiwa da oor haap u hadooh wa mynsoo.
Kamtæ u SP da ong u wa da ini i phla uni u bru, da che wym embynta kawon kawon ka Dumper Truck ha ini wa jia, wei da kyntu u ya ki paidbah wym toh wow pynpoor yaki khubor hamsaya khlem da pyntikna chwa.
Kam wow kdaw heini wa ha ki thaaiñ ka Tura haka 28 tarik u bnai wa dep da em kawi ka thuk-thuk kawa dang lai cha Tura kawa da chah tyrrah ha kawi ka Dumper Truck heiwa uwa yah thuk-thuk wa tip kam u Rakseng M Sangma da mynsoo joor u.
Ha ini i jia, uwa yah ya kani ka Dumper Truck uwa tip kam u Kazimuddin (32 snem) da yut u tangwa da yoh wow kem oo na Dhanua, South Salmara, Assam.
Haka 20 tarik u bnai wa dep hi, ar ngut ki kynthai da mynsoo joor ki hadien wa ka Scooty ki da chah tyrrah ko ha kawi ka Dumper Truck hajan ka ICFAI University wa em ha Ballonggre, Tura heiwa kawi na kani ka kynthai da dooh ko ya ki kjat ko wei man ko leh kawa dang lai skur.
Discussion about this post