Ynne i janmiet hadien kamwa 4:00 waje da em i ya tyrrah kari hapyrdi kawi ka Truck waka Maruti Omni Van iwa da jia ha Mukhla, Umsuwe hajan ka Pnar Service Station heiwa uwa yah ya ka Truck da yut na ini i thaw wa jia.
Kani ka Maruti Van wa em Number ML-04A-8136 da kylla ko dei chrooh hapyrdi u sarok NH-6 wei neiliang ki paidbah da yarap ki wow kit ya uwa yah wa uwi wa em hapoh cha Ummulong CHC chwa wow poi ki pulit.
Uwa yah ya kani ka Truck wa em Number AS-01MC-0572 da ieh u ka harood sarok hajan ka Pnar Service Station wei da yut u na ini i thaw.
Hadien wa kyrriah ya kani ka kari wa da kylla, da lai ki pulit cha Ummulong CHC wei manda poi heini da chem wa da kit ya uwa yah ya kani ka kari cha Hospital.
Manda lai ki cha Ummulong Beat House da chem wa da em uwa yah ya kani ka Truck uwa tip kam u Friency Pariat uwa na chnong Mookyndur uwa da yang ya ki pulit.
Hawa takit ya oo da khana u wa wa heipor wa wan u neiliang Lumshnong yow lai cha Guwhati deiwa kit Cement. Manda poi ha ini i thaw wa jia, da wan kani ka kari Maruti Van nei liang wa bakla tangwa neidaw wa da booh u ya kai ka Truck cha rood sarok, neiliang ki pulit ym ye ki wow pyntikna yeini wei ym pu em leh yoh u takit ya kiwon kiwon kiwa sakhi.
Uni uwa yah Truck da khana u wa da yut u na ini i thaw neidaw wa tieñ u ya chah dat heiwa da yut u cha ka Ummulong Beat House yow lait u jia iyi iyi ya oo.
Neiliang ki pulit da phah ki ya oo wow leh ya ka Medical Examination wei da phah ya oo wow lai booh ya ka Truck u cha i thaw wa man chngaaiñ neidaw wym chniam thaw ha Ummulong BH heiwa da booh noh ya kani ka Truck pyn hajan i yung wa sah uni uwa yah ha Mookyndur.
Yow lait u yut, neiliang ki pulit da ksoh ki ya u chabi wa ki Challan wa em u.
Heipor kamwa 8:00 waje da pyntip cha ki pulit da ki Doctor ka Woodland WK Hospital wa u bru wa mynsoo wa em hapoh Maruti Van toh uwa tip kam u Banrilang Ryndong uwa na chnong Moodymmai wei kattæ dang sumaar ya oo.
Discussion about this post