I yakhih ka seiñ ki tre Truck wa kiwa yah Truck hapoh ka lama yong ka Meghalaya Commercial Truck Owner and Driver’s Association (MCTODA) pyrchah ya ki Company Cement wa em ha Ri-loom Jaiñtia neidaw wym bien ki u su ka bai kit bai bah cha ki katkam ka dor wa da booh ka sorkar khnang yow ya imlang kam kiwa mylla, ynne ka sngi ka 30 tarik kani ka yakhih dapoi ko cha ka sngi wa soo, deiwa pynuiñ lut ya waroh ki kari kit Cement wa Clinker yong ki karkhana pynmih khyndaw bilat wa wan na ka thaiñ East Jaiñtia Hills ha u sarok Jowai Bypass ha ki bynta ka Mihmyntdu-Khliehtyrchi wa haap hapoh ka West Jaiñtia Hills District.
Ha kini ki sngi katwa dang lai i yakhih neiliang ki Company da pyrchang ki wow pynemkaam da ki bru samen yow pynpra yei yakhih yong ki tangwa ka MCTODA won yeiñ skem ko ha ka yurim khlem randien.
Kamtæ ynne won ka 30 tarik ka seiñ MCTODA da yoh pdiang ko ya ka chithi na u DC ka East Jaiñtia Hills District uwa da khut yaklam ya ki mynstep ka sngi ka 31 tarik ha yung krehkaam yong oo heipor 11:00 waje i step. Wei ha ini i khut yaklam yong oo daw emlang leh kiwa mihkhmat ki Company Cement.
Heiyatoh wa i yoh pdiang ya kani ka chithi, lyngba u Adviser yong ka Jaiñtia Unit, u Shmen Kyndait pyntip u wa mynstep ka sngi daw chong yalang ki para dkhot ha kani hi ka thaw wa man yakhih neibynta u ya pyrkhat lada daw lai næ ym lai cha katæ ka yaklam wa da khut u DC ka East Jaiñtia Hills District.
Wei hanla da yoh pdiang ki ya ka chithi leh pyntip u wa ka yakhih yong ki u dang pteiñ hi ko chakhmat la jia wa em ki dkhot wa lai yaklam leh.
Neitæ lada ka seiñ ym yoh ko ya ka rai wa sñiawhun i yakhih yong ki u nang pteiñ chooh chooh chakhmat wei ong ki leh ym sñiawphær ki lada hap chong ki ha kani ka thaw da ki bnai leh.
Discussion about this post