Jowai: Ki seiñ niam waphær waphær na ka nongbah Shillong ynne ka sngi da chimbynta ki ha ka yalang kynmoo warim ya u Montri Rangbahdooh warim ka ri, u Atal Bihari Vajpayee uwa da khlaad noh ha ka 16 tarik uni u bnai.
Ya kani ka yalang da pynman da ka Bharatya Janata Party (BJP) Meghalaya ha yung krehkaam yong ka ha nongbah Shillong, heiwa da em i ngooh blai wa kyrpang na ki seiñ niam wa kynthup nadooh ka Balang Katholic, CNI, Hindu, Muslim, Seng Khasi, Seiñ Raij, Buddhist, Sikh wa kiwi kiwi.
Ha kani ka yalang waroh kiwa kitkaam niam kiwa da e yei ngooh blai wa kyrpang neibynta u Vajpayee deiwa pynsñiaw leh wa man u montri Rangbah dooh ka ri uwa khroo uwa khlem ñiaw beiñ ya kiwa khian, ki heh namo kiwon kiwon ki ngait niam namo jaitbru.
Neiliang ka Balang Katholic da mihkhmat da u Rev. Fr. John Madur uwa man u Vicar General ka Shillong Archdiocese, uwa da puræ leh ya ka dkhot ka bible, wei kamjooh leh kiwi kiwa yahkhmat da puræ ki ya jaar jiar i thoh ki kot niam yong ki.
Hadien ka yalang da em i chim bynta ki seiñ saiñ pyrthai neibynta ini i jooh i thmu wow kynmoo warom ya u Vajpayee heiwa da emlang ka UDP, HSPDP wa kiwi kiwi.
Ka BJP daw pyntooid ko yei tpai u Vajpayee mynstep ka sngi ha wah Umshyrpi katkam i ngait niam ki Hindu, wei yeini da leh ha waroh kawi ka ri India mynstep.
Discussion about this post