Shillong: Kiwa kreh ka MCCL hapoh ka lama yong ka Mawmluh Cherra Cement Employee’s Union da rai yakhih ki ynne ka sngi hajrong i dawa wow pyndep noh yei su ya ka poisa wa sahteiñ la 8 bnai wei kamjooh ka bai kreh palat por (Extra Time) kawa da sahkut nadooh u snem 2013.
Hawa yaklam wa kiwa pathai khubor hadien wa yachem wa u montri ka MCCL u Sniawbhalang Dhar, neiliang u President ka Union, u S. Diengdoh da ong u wa kiwa kreh ka MCCL Grade IV chem chitom bha ki nadooh wa chah kset ka tulop ki kattu la 8 bnai lynter kawa man nadooh u Naikhynde 2015 hadooh u Wisu 2016 nalor i wym su ya ka bai kreh palat por.
“Kiwa kreh yei kaam yong ki kiwa rap khian ha kani ka Company chem chitom ki neibhah wym yoh ki wot yei nong wa toh hok u yoh ki kam ka bai dawai heipor wa kjut wa kiwi ki laad yada,” da ong u Diengdoh.
U Diengdoh da pyntip u leh wa hadooh katni kiwa kreh ka MCCL da im ki lær lær naka tulop wa yoh ki chisien hadien boon bnai wei ini da wanrah i chiboon i chitom ya ki wow pyndap yeiwa emkaam ki ha yung ha sem.
“Kam ka dak wow pyrshah yeini i leh ka sorkar, mynstep ka sngi u sdang noh i dei yakhih deiwa sangeh u kreh wei daw pteiñ da kiwi ki jait yakhih ha ki sngi wa bood,” da ong u.
Heijooh i por da pyntip u wa neiliang u montri da kular u wow yaklam yeini wa u montri rangbah ka jylla chwa wa ka sorkar u leh ko iwon iwon hajrong ini i dawa yong ki.
Discussion about this post