Shillong: Ka Regional Democratic Alliance (RDA) kawa man ka satri ki ar seiñ wa kynthup ya ka UDP wa HSPDP da chim ko ya 3 tylli ki rai wow yada nei wan psiah ki bru na baar khamtam nei pynman aiñ ya ka Citizenship Amendment Bill (CAB).
Hawa yaklam wa kiwa pathai khubor hadien ka yalang, u Working President ka UDP u Paul Lyngdoh da ong u wa ka UDP daw lai synraan lang ko ya u Montri Rangbah, u Conrad Sangma wow yachem ya u Amit Shah neibynta wow kyntu wow pynlait ya ka jylla waroh kawi na ki kyndon ka CAB.
Da ong u leh wa ka RDA da rai ko wow tynrooh ya u Lat ka jylla wow pynsmat u soi noh ya ka Ordinance yong ka Meghalaya Residents Safety and Security Act 2016, wei kawi won ka rai toh wow dawa pynlait pura ya ka jylla Meghalaya na ka Citizenship Amendment Bill neibhah i pynlait du ya ki thaw wa haap ha ki Sixth Schedule ym biang i.
Kawi won ka rai toh wow dawa na ka sorkar pyrdi lyngba ka sorkar jylla wow pynkrehkaam da ka Inner Line Permit (ILP) ha Meghalaya kamwa da leh ha Manipur.
Ya ka CAB da mynjur ynne sngi ha Rajya Sabha hadien ka dorbar Lok Sabha wow man aiñ, tangwa hawa kylli, u Paul da ong u wa i lai wow dawa pynlait ya ka jylla na ka CAB toh hajrong ka yurim wa ya ki aiñ ye u pynkylla, deiwa pynrap wa kawon kawon ka aiñ ym man ko kawa khaddooh khlem i pynkylla.
Hajrong i kyrchaan ka MP ka NPP na Tura, ka Agatha Sangma ya ka CAB, u Paul da ong u wa ka MP da klam ko yei sñiaw samen ym yei sñiaw ka sorkar MDA.
Hajrong i kyntait ka Congress ya ka ILP, u Paul da ong u wa ka Congress nadooh nachwa toh kawa kyntait ya ka ILP neibhah ha u snem 2013, ka Committee wa khlieh da u symbood montri rangbah, u Bindo M. Lanong da phah ko ya ka yumut cha ka sorkar wa ka ILP toh ka bor wa biang wow khoom u kdoh yei wan psiah ki bru na baar tangwa ka sorkar u Dr. Mukul Sangma ha kitu ki por da kyntait ko yeini.
Discussion about this post