I e dawai yada na u COVID-19 namo i Vaccine hapoh India u sdang noh ko nadooh mynstep ka 16 tarik. Ka jylla Meghalaya leh da pynkhreh ko ya kani ka sngi, heiwa 16,000 ngut ki wakreh ka chnat i chait i khiah u yoh nyngkong ki yei Inject dawai wow yada na u khñiang khlam.
Hawa yaklam wa u Montri wa pait yaka chnat i chait i khiah, u Alexander Laloo Hek da pyntip u wa ha Meghalaya ya i sdang wow e dawai yada COVID-19 daw wai da u Montri Rangbah ka jylla, u Conrad K Sangma ha North Eastern Indira Gandhi Regional Institute of Health and Medical Sciences (NEIGRIHMS).
Hawa kylli, u Montri da pyntip u wa katkam ki kyndon wa da booh, i e ya ki dawai daw sdang bait chwa na ki wakreh ha i chait i khiah, wei hadien daw bood sa ya ki paidbah.
Neiliang ka sorkar pyrdi da pynbna ko wa ha ka Phase -I, i e Inject daw man ko i pynlut na ka sorkar, tangwa hawa kylli won ha i bynta wa ar næ ka Phase-II, u Hek da ong u wa ka sorkar jylla ym pu em pyrkhat kammon wow lai, tangwa neiliang ka sorkar jylla daw kyrpaad ko ya ka sorkar pyrdi wow pynbiang bait ya i dawai.
Hawa kylli won hajrong i kynthup ya ini i dawai ha ka MHIS, u Hek da ong u wa hadooh katni, ka sorkar jylla ym pu yaklam ko ya kani ka phang, neibhah kamwa man, ka sorkar pyrdi u dang pynlut ko deiwa e Inject khlem emkaam wow su, tangwa ka sorkar jylla daw pyrkhat ko leh ya iwa toh u leh yow lait ki paidbah u dooh myntoi.
Neiliang u Symbood Myntri Rangbah ka jylla, u Prestone Tynsong da kyntu u ya waroh ki wakreh ka chnat i chait i khiah wow lai chah Inject ki nadooh mynstep ka sngi, wei ym toh wow em ki yei artatien næ tieñ, neibhah ya ki dawai da dep wow Test bniah chwa wow e cha ki paidbah, tangwa da ong u leh wa lada em kiwon kiwon kiwa ym kwah ya i dawai, ka sorkar ym ye ko wow pynbor.
