I yachem yong ki ar ngut ki Montri Rangbah ka jylla Meghalaya wa Assam, u Conrad K Sangma wa u Himanta Biswa Sarma neibynta i pynbait noh ya u pood u ang yong kini ki ar jylla daw man ko mynstep ka 12 tarik ha nongbah Guwahati, Assam heipor 1 waje i sngi.
Ha ini i yachem ki ar ngut ki Montri Rangbah mynstep ka sngi, da yooluti wow yoh noh ya i rai hajrong ki 6 tylli ki thaw wa ya kajia kiwa rap suk wow pynbait napyrdi ki 12 tylli ki thaw wa em ha khappood.
Kam wow pynkynmoo wa i yachem wa khaddooh kawa da man ha ka 15-12-21, ki ar ngut ki Montri Rangbah deiwa emlang ki Montri sorkar yong waroh ar jylla da chim ki yei rai wow pynbait noh ya i bynta wa nyngkong ha lane chwa ka 15 tarik uni u bnai.
I yaklam wow pynbait noh ya u pood u ang hapyrdi ki ar jylla da lai ko chait chait nadooh u snem wa dadep, heiwa u Montri Rangbah ka Assam da wan u cha nongbah Shillong ha u Naiynñiaw yong u snem wa da dep wow sdang yei yaklam, wei hadien ini da bood chooh chooh i yachem ha Assam, wei da thung leh ya ki Regional Committee kiwa da dep wow phah ya ki Report cha jar jiar ki Montri Rangbah.
Neiliang ki ar jylla da rai pynbait chwa ya ki 6 tylli ki thaw wa rap suk na ki 12 tylli ki thaw wa ya kajia, kitæ ha i bynta wa nyngkong da rai wow pynbait chwa ya ka Tarabari, Gizang Reserve Forest, Hahim, Boklapara, Pilangkata Khanapara wa ka Ratacherra.
