Jowai: U khynroo Kamphereiei Pala wa puræ ha North Liberty Higher Secondary School Jowai, uwa yoh haka kyrdan 8th Position ka thup Top-10, Result HSSLC Science Stream ka MBOSE, da ong u, “Ym phær lada wan phi na kawon kawon ka manyung tangwa iwa phær toh kammon wan phi na ka manyung wei i dooh i duk ym khanglaad ko ya kiwon kiwon wow poi cha ka thong wei iwa khanglaad toh kammon wa minot wa i kreh chitom haka kaam.”
Kam u khynnah wa wan naka manyung wa dooh naka chnong Moolamylliang, East Jaiñtia Hills District da khana u. “Nadooh wa dang khian O, ka thong wa hakhmat dooh ka yong nga toh ka puræ puthi, wei hapyrdi i dooh i duk leh, ka bei O em ko i thrang wow pynlai skur ya ki khon, kamæ nadooh i rta wa dang khynnah ha i por wa yoh chuti nga pyrchang O wow mylla ha kawon kawon ka kaam wa yoh ha chnong wei na ini da ye wow kyrchaan wow su bai kot bai skur pyn da nga ya nga hi.”
“Hanlada nga wan ko naka manyung wa dooh wa duk leh tangwa u Blai sñiaw u yei ngooh Blai O, heiwa da yoh O chiboon ki kyrchaan na kiwa hayung hasem, ki lok ki jor, wot hadooh ka bai skur ha North Liberty leh da yarap da u Principal iwa ym hap su O “. Da pynrap u Kampher hawa pynsñiaw yei sñiawngooh ya waroh kiwa kyrchaan ya oo.
Da kyntu u leh ya ki khynnah skur wow man ki kiwa kitkhlieh bha ya i rukom im ki khamtam haka rta khai khynroo neidaw wa em boon ki pynchoi wa wan iwa ktah yaka puræ puthi kamjooh ya ka imlang sahlang. Da pynsakhiat u ya ini deiwa ong wa boon na ki lok u ym em poi thong ki haka puræ puthi wa chah eiñ ki ha i pynchoi.
Heiyatoh waka stat sayan wa katni namo ka Technology da ong u wa ha-o ym ye wow len wa ka yarap bha ko neibynta ka puræ puthi, tangwa boon ki khynnah wa pynemkaam bakla yaka wei hei yong samen leh da maad u ya ini. Kamtæ da kyntu u wa toh u pyrchang pynemkaam haka luti wa toh.
“Haki ar snem wa nga puræ O ha kani ka skur North Liberty, nga chem O wa em ko iyi iyi wa phylla heini, i tæ nadooh u Principal, kiwa sikai kamjooh kiwa kreh ka skur kiwa em ka mynsien pynchlur deiwa ong wa i minot haka puræ puthi namo i kreh ya kawon kawon ka kaam ym du neibynta ka poisa tangwa toh u pyrkhat wow pynku yaka bha ka miat ka imlang sahlang,” ong u Kamphereiei hawa wyrchaw u wa kiwi ki skur wa jooh lai puræ u nachwa kam ha Shillong, Jowai wa ka skur ha chnong.
U Kamphereiei Pala da pyndep u yaka SSLC na Tluh Secondary School, East Jaiñtia deiwa yoh 90.5%.
Also Read: 2 ngut yoh Top-10 ka North Liberty ha ka HSSLC Science Stream
Discussion about this post