Katkam wa man katni u Coronavirus dang joor i ktah u ya ki bru ha kylleiñ ka pyrthai kat dang mih ki sngi wei ki sorkar ki wa ki dhab kam ka World Health Organisation dang yaleh ki kammon wow sumaar wow pynwiar ya uni u khñiang.
Ynnin ka sngi ka National Health Commission yong ka China da pyntikna ko wa kiwa yap neidaw u Coronavirus da poi i cha ka 106 ngut katwa ynne da ku i chadooh 132 ngut.
Kiwa da chah ktah namo kiwa da bi kjut na uni u khñiang won hadooh ynnin da poi i palat 4,000 ngut katwa ynne won da kynjoh i hadooh kamwa 6,000 ngut ki bru.
Chooh chooh ki bor sorkar dang suba ki wa em kamwa 9,200 ngut wa yoh ya uni u khñiang wei dang booddien ki yei i man i long yong kamwa 59,990 ngut kiwa yajan wa ki bru wa da pyntikna wa em ya uni u khñiang.
Hadooh wa pynmih ya kani ka Wyrta, hapoh India ympu em u pyntikna wa da em wa chah ktah ha uni u khñiang.
Discussion about this post