Na ka 332 Gram i pynmih dud ka ri ya uwi u bru ha ri-loom Jaiñtia nawon du 85 Gram donhi

Jowai: Ka Jaiñtia Hills District Milk Producer Co-Opt Union Ltd. kawa da seiñ nadooh u snem 2009 lyngba ki 32 tylli ki Society ynne ka sngi da pynman ki yei kynmoo warom wa nyngkong yaka National Milk Day ha Lad Mukhla L.P. & U.P. SSA School.

Kani ka National Milk Day haap ko haka 26 tarik kawa man leh ka sngikha u Dr. Verghese Kurien, neidaw wa man ko ka sngi Bibar da leh warom noh ya ka ynne ka sngi.

U Dr. Verghese Kurien man u pa yong ka White Revolution haka ri uwa da seiñ hadooh 30 tylli ki Cooperative Society wa kynthup ya ka AMUL, GCMMF, IRMA, NDDB heiwa ka AMUL man ko kawa da pawnaam bha hapoh ka ri India.

Kani ka seiñ kiwa pynmih dud hapoh ri-loom Jaiñtia toh kawa seiñ yow pynchlur ya kiwa psan masi wei wow chimkhia ki ya ka neibhah hapoh ka District dang duna ware i pynmih dud neibhah ha waroh ka ri da pynmih 332 Gram ya uwi u bru katwa hapoh ka ri-loom Jaiñtia won da ye u pynmih du 85 Gram donhi uwi u bru wei lada waroh toh kiwa dih dud ym ye u pyndap yeiwa emkaam.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

U Manager ka Dairy Plant ka Jowai Dairy Plant u B. Dkhar da ong u wa em ki por dang rap chem chitom ki neibhah ki dkhot ka seiñ kiwa pynmih dud toh ki wym em masi wei da pynchlur u ya ki wow thied masi ki yow ye u pynmih chiboon i dud wei ym man ko ka kaam wa poh wow ri masi.

Neiliang ka kongsan ka B. Blah kawa man leh kam ka BDO ka Thadlaskeiñ Block da ong ko em i yarap ka sorkar wa T. 35,000 wa ye u pynkrehkaam lyngba ka MGNREGS wow chna trep masi wei emkaam leh u pynchlur ya kani ka kaam kawa dang duna bha ki bru wa leh ya ka yow ye u pyndap yei emkaam dud.

Ka Dr. E.Passah kawa na ka District AH & Veterinary ka West Jaiñtia Hills da ong ko wa i dud toh iwa emkaam bha u dih neibhah em ha i dud chiboon kiwa bynta wa ye u tei ya doh i pran nadooh dang khian wei ya kiwa da kynjoh 40 snem cha neiñ yarap ko wow pynkhlan ya ki chyieñ neibhah ha kini ki rata da sdang chruiñ ki chyieñ.

Ka M. Buhphang won da ong ko wa i thong yong ka Union toh yow wanrah yei kaam ri masi ha kajooh ka rynsan khlem da kheiñ ya ka niam næ kyrdan, i rukom krehkaam ka Union toh wow chim ya ki dud yong ki yow pynpoi cha ka Dairy Plant wei da ong ko wa emkaam boon ki dkhot wow psiah cha kani ka Union yow poi cha ka thong.

Hadien wada kut ka yalang da saam dud leh cha ki khynnah skur daka kongsan wa kiwi kiwi.