Jowai: Ha ka yalang paidbah wa da pynman da u kyrtong MLA na Nartiang Constituency u Innocent Shadap haka 14 tarik uni u bnia heripor 7 waje i miet ha pchem ka SBI Bank Ummulong, da pynskem ya kiwa kitkaam ka party KHNAM Ummulong Unit wa ka CEC yong ka wow e Ticket MLA ya u Innocent Shadap.
Ya kani ka yalang da pyllai da u Bankerlang Siangshai uwa man leh u Secretary ka Ummulong Unit ka KHNAM hei emlang u Working President u Adelbert Nongrum, Chief Adviser u T.H.S. Bonney, President State Youth Wing u Thomas Passah wa kiwi kiwi ki dkhot ka Party ryngkat wa ki waheh wasian ka Constituency wei waroh da da ki hajar ngut ki bru wa wan cha kani ka yalang.
Da yoh leh ya i klam na ki waheh na ki chnong waphær waphær hapoh ka Constituency.
Neiliang ka Party da pynsñiaw ki ya ki yurim ki yong ka na u T.H.S Bonney (Rtd IFS) Candidate M.P. 2019 Shillong Parliamentary Constituency wa na u Thomas Passah President State Youth Wing.
U Adelbert hei klam yong oo da kyntu u ya ki paidbah ka Constituency wym hoi u biej ki ya ka poisa kawa T.5000-T. 10,000 namo i kular thung khih thung kreh sorkar heipor election.
Da ong u leh lada bakla phi u jied, san snem da man broo phi. Da beiñ joor u leh ya ki MLA kiwa katni ki wymtip u chna aiñ kiwa tip du kat wow pynheh spah yong samen.
“Hei thaw u chna ki ya ka Mining Policy da chna pathan ki da ka aiñ baam ar maloi yow myntoi du kat ya ki hi-eh.”
Kamtæ da kyntu u ya ki paidbah wow jied ki ya ka KHNAM kawa man ka party ki tre ri neibhah ka ri ka jaitbru em ko ha kyndian riat wei ka KHNAM ye ko wow pynim biang ya ka jaitbru da iwi.
U Innocent Shadap won hei klam yong o da khana u wa i daw wa jied u ya ka party KHNAM toh neidaw wa yoo u em du kani don hika Party tre ri kawa em sakhiat ka yurim wa skem kawa ye u yada ya ka jaitbru yong i.
Da ong u leh “Ha kani ka Election ki kyrtong naka 1-Nartiang toh du kiwa biang ya ka lak ka klur wei kiwa ye u thied ya phi heipor election, tangwa hadien wa jop ki kut hi-eh ka 5 snem hei pyllang ya kawa da pyllut ki.”
Kamtæ da kyrpaad u dei mynsien wa khian dei mynsien wa maya wow kyrchaan ki chi buit chi bor ya oo ha ka party KHNAM, ka party kawa yieñ u yaleh Election da ka hok ymtoh kam kiwi da ka bor poisa khnang wa oo leh hadien wa da jop u, u yoh u pynroi ya ka Constituency wa ya ka ri ka jaitbru hi waroh kawi.
Ha chwa wow wai ka yalang da yoh i klam e khublei na u khynroo Kamwathmupaia Lamare uwa man leh u Publicity Secretary ka Ummulong Unit.
Discussion about this post