Hei step synyaaw ka 28 tarik uni u bnai, 3 tylli ki kari da iñkhaw ki hadien wa da mih i yachoh yadat hapyrdi kawi ka liang wa uwi u bru wa yah kari Swift.
Ini da jia i ha ka dong Umkor, Pynursla heiwa ka kari Swift da chah thang ko wei 2 tylli ki kari wa kynthup ya kawi ka Scorpio wa ka Redigo kiwa pynyieñ ha chrooh ka Swift wa em harood sarok da iñkhawlang ki.
Katkam ka khubor wa da yoh da ong wa i chah thang kitai ki kari toh neidaw wa em chwa i kynaad wei yachoh wa uwa yah ya ka kari Swift wa ar ngut ki bru.
Da ong leh wa da kyrooh ini waroh wa ki ar ngut wa da pynbaad wa da em muaid bha wei da chah dat uwa yah ya ka Swift uwa da yakhun pyrchah wei da dait u ya uwi u bru na kti hadooh wa da mih wei da bi snaam leh cha ka kari.
Da ong leh wa ki ar ngut da yut ki na kani ka thiaw chipor wei da uiñ biang ki deiwa yahlang rap boon ngut ki bru wei da kdong ya uwa yah ya ka Swift, iwa da pynman ya uwa yah ya ka Swift wow ieh u ya ka kari deiwa yut cha khloo ha ka thaaiñ Urksew Wahpathaw.
Da suba joor wa i chah thang katai ka kari wa da leh da kitai ki bru hadien wa khlem da yoh de ki ya uwa yah ya ka Swift, wei i diñ da poor leh cha ka kari Scorpio wa Redigo kiwa yieñ hajan.
Da yoh khubor leh wa heipor step u tre ka kari Swift deilang kiwa ha-yung da lai ujor ki ha Pynursla Police Station yow kem ya kiwa emkti deiwa khana leh wa em ki kattu katni kiwa em hakhmat wow leh yeini.
Da yoh khubor leh wa ki tre yong ki ar tylli ki kari leh kiwa da iñ da ujor ki ha Pynursla Police Station pyrchah ya kiwa emkti ha ini i kaam, wei da pynbaad leh wa kitai kiwa leh ya ini i kaam toh kiwa lai Fete.
Hajrong ini wa jia, ki pulit da pynman ki yei takit wei dang thooh ya ki bru wa emkti ha ini wa jia.
Discussion about this post