Ka seiñ Congress da pynkhreh bha ko neibynta ka Election MLA 2023 na Sohïong Constituency deiwa sai ya u sahep warim ka chnat Custom uwa da ksoh ya i kyrdan Superintendent, u S. Osborne Kharjana.
Hawa klam ha ka yalang kiwa yahkhmat ki Unit ynne ka sngi ha Mawmaram, u Osborne da ong u wa da psiah u cha ka saiñpyrthai toh neidaw ka jaitbru da chah rkhai beiñ ko ha kiwi ki jaitbru ka ri India man ka 5 snem, neibhah ka jaitbru Khasi man ki kam ki datham kiwa yataan para ki.
Da ong u wa u ki dakhar ya ki Khasi da ong ki, “Mama Khasi to Mama Buddhu”, iwa mut wa toh kiwa biej wei ki Khasi man ki kam ki datham. Hawa pynche yeini hapoh Meghalaya em 60 ngut ki MLA, 34 ngut na Khasi-Jaiñtia katwa 24 ngut na Garo, tangwa man ka 5 snem da yoo wa du u Sangma wa man Montri Rangbah iwa mut wa ki 24 ngut synchaar ki ya ki 36 ngut.
U Kharjana da ong u wa hawa thooh ya ki daw toh wa ki paidbah wa jied, neibhah wa chong ha ka chi Vote wow rai ya ka ri waka jaitbru, wei lada ym em kiwa jied ym em ka sorkar. Da ong chooh chooh u wa i daw wa yoh Montri Rangbah du ki Garo waroh chi kattu man kamwa jied ya ki MLA kiwa ym lait klam, deiwa pynrap wa hawa jied ya ki MLA wym lait klam yoh Montri Rangbah pathan da u Garo, wot hawa 36 ngut da em chwa ka chuki Montri Rangbah cha ki Khasi-Jaiñtia weileh won u e kti du cha u Garo.
Ha ka yalang kawa da man ynne ka sngi da wan chimbynta da ki spah ngut kiwa kitkaam wa ki dkhot ki Unit waphær waphær ka Congress yong ka Sohïong, wei ha kani ka sngi da wan kyrchaan leh da ki MLA warim wa ka pyrsa deilang waka diah tre u HDR Lyngdoh, wa ki heh ka Congress na East Khasi Hills District.
